did ki tamanna mein aankh bhar ke roe the

diid kī tamannā meñ aañkh bhar ke ro.e the

ham bhī ek chehre ko yaad kar ke ro.e the

sāmne to logoñ ke ġham chhupā liye apne

aur jab hue tanhā ham bikhar ke ro.e the

ham se in añdheroñ ko kis liye shikāyat hai

ham to ḳhud charāġhoñ kī lau katar ke ro.e the

jab talak the kashtī par ḳhud ko rok rakkhā thā

sāhiloñ pe aate hī ham utar ke ro.e the

aa.ine meñ rotā vo aks bhī hamārā thā

jis ko dekh kar aksar ham biphar ke ro.e the

yaad hai abhī tak vo ek shaam bachpan kī

jaane kyā huā thā sab log ghar ke ro.e the

sāhiloñ pe aatī hai aaj bhī sadā un kī

Dūbne se kuchh pahle jo ubhar ke ro.e the

har taraf thī ḳhāmoshī aur aisī ḳhāmoshī

raat apne saa.e se ham bhī Dar ke ro.e the

tab patā chalā ham ko zaḳhm kitne gahre haiñ

dard ke nasheboñ meñ jab utar ke ro.e the

ham ne apnī āñkhoñ se hādsa vo dekhā thā

pattharoñ kī bastī meñ zaḳhm sar ke ro.e the

did ki tamanna mein aankh bhar ke roe the

hum bhi ek chehre ko yaad kar ke roe the

samne to logon ke gham chhupa liye apne

aur jab hue tanha hum bikhar ke roe the

hum se in andheron ko kis liye shikayat hai

hum to KHud charaghon ki lau katar ke roe the

jab talak the kashti par KHud ko rok rakkha tha

sahilon pe aate hi hum utar ke roe the

aaine mein rota wo aks bhi hamara tha

jis ko dekh kar aksar hum biphar ke roe the

yaad hai abhi tak wo ek sham bachpan ki

jaane kya hua tha sab log ghar ke roe the

sahilon pe aati hai aaj bhi sada un ki

Dubne se kuchh pahle jo ubhar ke roe the

har taraf thi KHamoshi aur aisi KHamoshi

raat apne sae se hum bhi Dar ke roe the

tab pata chala hum ko zaKHm kitne gahre hain

dard ke nashebon mein jab utar ke roe the

hum ne apni aankhon se hadsa wo dekha tha

pattharon ki basti mein zaKHm sar ke roe the