dariya ne kal jo chup ka libaada pahan liya

dariyā ne kal jo chup kā libāda pahan liyā

pyāsoñ ne apne jism pe sahrā pahan liyā

vo TaaT kī qabā thī ki kāġhaz kā pairahan

jaisā bhī mil gayā hameñ vaisā pahan liyā

fāqoñ se tang aa.e to poshāk bech dī

uryāñ hue to shab kā añdherā pahan liyā

garmī lagī to ḳhud se alag ho ke so ga.e

sardī lagī to ḳhud ko dobāra pahan liyā

bhauñchāl meñ kafan kī zarūrat nahīñ paḌī

har laash ne makān kā malba pahan liyā

'bedil' libās-e-zīst baḌā dīda-zeb thā

aur ham ne is libās ko ulTā pahan liyā

dariya ne kal jo chup ka libaada pahan liya

pyason ne apne jism pe sahra pahan liya

wo TaT ki qaba thi ki kaghaz ka pairahan

jaisa bhi mil gaya hamein waisa pahan liya

faqon se tang aae to poshak bech di

uryan hue to shab ka andhera pahan liya

garmi lagi to KHud se alag ho ke so gae

sardi lagi to KHud ko dobara pahan liya

bhaunchaal mein kafan ki zarurat nahin paDi

har lash ne makan ka malba pahan liya

'bedil' libas-e-zist baDa dida-zeb tha

aur hum ne is libas ko ulTa pahan liya