bichhaD gaya hai to ab us se kuchh gila bhi nahin

bichhaḌ gayā hai to ab us se kuchh gilā bhī nahīñ

ki sach to ye hai vo ik shaḳhs merā thā bhī nahīñ

maiñ chāhtā huuñ use aur chāhne ke sivā

mire liye to koī aur rāstā bhī nahīñ

ajiib rāhguzar thī ki jis pe chalte hue

qadam ruke bhī nahīñ rāstā kaTā bhī nahīñ

dhuāñ sā kuchh to miyāñ barf se bhī uThtā hai

so dil-jaloñ kā ye aisā koī patā bhī nahīñ

ragoñ meñ jamte hue ḳhuun kī tarah hai 'sa.ūd'

vo harf-e-hijr jo us ne abhī kahā bhī nahīñ

bichhaD gaya hai to ab us se kuchh gila bhi nahin

ki sach to ye hai wo ek shaKHs mera tha bhi nahin

main chahta hun use aur chahne ke siwa

mere liye to koi aur rasta bhi nahin

ajib rahguzar thi ki jis pe chalte hue

qadam ruke bhi nahin rasta kaTa bhi nahin

dhuan sa kuchh to miyan barf se bhi uThta hai

so dil-jalon ka ye aisa koi pata bhi nahin

ragon mein jamte hue KHun ki tarah hai 'saud'

wo harf-e-hijr jo us ne abhi kaha bhi nahin