ai yas jo tu dil mein aai sab kuchh hua par kuchh bhi na hua

ai yaas jo tū dil meñ aa.ī sab kuchh huā par kuchh bhī na huā

yaañ ho ga.ī ḳhāna-vīrānī aur terā zarar kuchh bhī na huā

thā qasd ki un ko rokeñgi shab guzrī inhīñ andeshoñ meñ

par hā.e-re nākāmī dil kī hañgām-e-sahar kuchh bhī na huā

ehsān tirā mujh par hotā gar ruuh ko kartā tan se judā

jab jaan bachī furqat kī shab ai dard-e-jigar kuchh bhī na huā

ai kaash vo bāteñ kī hotīñ jo vahshat-e-dil ko kam kartīñ

itnā jo bakā to ai nāseh mujh ko to asar kuchh bhī na huā

ab chāhiye aisī fikr tujhe jis se ki nazāre kī Thahre

har vaqt ke rone se hāsil ai dīda-e-tar kuchh bhī na huā

dil aur jigar jaañ aur ye sar ham shauq se laa.e paas tire

qismat kā gila ab kis se kareñ manzūr-e-nazar kuchh bhī na huā

yā us se javāb-e-ḳhat laanā yā qāsid itnā kah denā

bachne kā nahīñ bīmār tirā irshād agar kuchh bhī na huā

dhun vasl kī tujh par ġhālib hai tū aish-o-tarab kā tālib hai

kyā lutf 'haqīr' is ulfat kā betāb agar kuchh bhī na huā

ai yas jo tu dil mein aai sab kuchh hua par kuchh bhi na hua

yan ho gai KHana-virani aur tera zarar kuchh bhi na hua

tha qasd ki un ko rokengi shab guzri inhin andeshon mein

par hae-re nakaami dil ki hangam-e-sahar kuchh bhi na hua

ehsan tera mujh par hota gar ruh ko karta tan se juda

jab jaan bachi furqat ki shab ai dard-e-jigar kuchh bhi na hua

ai kash wo baaten ki hotin jo wahshat-e-dil ko kam kartin

itna jo baka to ai naseh mujh ko to asar kuchh bhi na hua

ab chahiye aisi fikr tujhe jis se ki nazare ki Thahre

har waqt ke rone se hasil ai dida-e-tar kuchh bhi na hua

dil aur jigar jaan aur ye sar hum shauq se lae pas tere

qismat ka gila ab kis se karen manzur-e-nazar kuchh bhi na hua

ya us se jawab-e-KHat lana ya qasid itna kah dena

bachne ka nahin bimar tera irshad agar kuchh bhi na hua

dhun wasl ki tujh par ghaalib hai tu aish-o-tarab ka talib hai

kya lutf 'haqir' is ulfat ka betab agar kuchh bhi na hua