ada-e-hairat-e-aina-gar bhi rakhte hain

adā-e-hairat-e-ā.īnā-gar bhī rakhte haiñ

hameñ na chheḌ ki ab tak nazar bhī rakhte haiñ

na gird-o-pesh se is darja be-niyāz guzar

jo be-ḳhabar se haiñ sab kī ḳhabar bhī rakhte haiñ

kahāñ gayā tirī mahfil meñ zom-e-dīda-varāñ

ye hausla to yahāñ kam-nazar bhī rakhte haiñ

qafas ko khol magar itnā soch le sayyād

bahut asiir tere bāl-o-par bhī rakhte haiñ

farishta hai to taqaddus tujhe mubārak ho

ham aadmī haiñ to aib-o-hunar bhī rakhte haiñ

ḳhushā-nasīb ki dīvāne haiñ to ham ai 'dil'

kamāl-e-nisbat-e-dīvāna-gar bhī rakhte haiñ

ada-e-hairat-e-aina-gar bhi rakhte hain

hamein na chheD ki ab tak nazar bhi rakhte hain

na gird-o-pesh se is darja be-niyaz guzar

jo be-KHabar se hain sab ki KHabar bhi rakhte hain

kahan gaya teri mahfil mein zom-e-dida-waran

ye hausla to yahan kam-nazar bhi rakhte hain

qafas ko khol magar itna soch le sayyaad

bahut asir tere baal-o-par bhi rakhte hain

farishta hai to taqaddus tujhe mubarak ho

hum aadmi hain to aib-o-hunar bhi rakhte hain

KHusha-nasib ki diwane hain to hum ai 'dil'

kamal-e-nisbat-e-diwana-gar bhi rakhte hain