Sher on Zindagi

'mīr' amdan bhī koī martā hai

jaan hai to jahān hai pyāre

'mir' amdan bhi koi marta hai

jaan hai to jahan hai pyare

shām-e-mimbar par fazīlat ke bahut sanjīda farhāñ

sub.h-dam afsurdagī ke farsh par bikhrā huā maiñ

sham-e-mimbar par fazilat ke bahut sanjida farhan

subh-dam afsurdagi ke farsh par bikhra hua main

kitnī sachchā.ī se mujh se zindagī ne kah diyā

tū nahīñ merā to koī dūsrā ho jā.egā

kitni sachchai se mujh se zindagi ne kah diya

tu nahin mera to koi dusra ho jaega

har nafas umr-e-guzishta kī hai mayyat 'fānī'

zindagī naam hai mar mar ke jiye jaane kā

har nafas umr-e-guzishta ki hai mayyat 'fani'

zindagi nam hai mar mar ke jiye jaane ka

is tarah zindagī ne diyā hai hamārā saath

jaise koī nibāh rahā ho raqīb se

is tarah zindagi ne diya hai hamara sath

jaise koi nibah raha ho raqib se

be-ta.alluq zindagī achchhī nahīñ

zindagī kyā maut bhī achchhī nahīñ

be-talluq zindagi achchhi nahin

zindagi kya maut bhi achchhi nahin

kabhī khole to kabhī zulf ko bikhrā.e hai

zindagī shaam hai aur shaam Dhalī jaa.e hai

kabhi khole to kabhi zulf ko bikhrae hai

zindagi sham hai aur sham Dhali jae hai

masarrat zindagī kā dūsrā naam

masarrat kī tamannā mustaqil ġham

masarrat zindagi ka dusra nam

masarrat ki tamanna mustaqil gham

zindagī ham se chāhtī kyā hai

chāhtī kyā hai zindagī ham se

zindagi hum se chahti kya hai

chahti kya hai zindagi hum se

ishq ke mazmūñ the jin meñ vo risāle kyā hue

ai kitāb-e-zindagī tere havāle kyā hue

ishq ke mazmun the jin mein wo risale kya hue

ai kitab-e-zindagi tere hawale kya hue

ayāl-o-māl ne rokā hai dam ko āñkhoñ meñ

ye Thag haTeñ to musāfir ko rāsta mil jaa.e

ayal-o-mal ne roka hai dam ko aankhon mein

ye Thag haTen to musafir ko rasta mil jae

ham log to marte rahe qistoñ meñ hamesha

phir bhī hameñ jiine kā hunar kyuuñ nahīñ aayā

hum log to marte rahe qiston mein hamesha

phir bhi hamein jine ka hunar kyun nahin aaya

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

man ki aaghosh mein kal maut ki aaghosh mein aaj

hum ko duniya mein ye do waqt suhane se mile

qaid-e-hayāt o band-e-ġham asl meñ donoñ ek haiñ

maut se pahle aadmī ġham se najāt paa.e kyuuñ

qaid-e-hayat o band-e-gham asl mein donon ek hain

maut se pahle aadmi gham se najat pae kyun

ishq ko ek umr chāhiye aur

umr kā koī e'tibār nahīñ

ishq ko ek umr chahiye aur

umr ka koi e'tibar nahin

mirī zindagī pe na muskurā mujhe zindagī kā alam nahīñ

jise tere ġham se ho vāsta vo ḳhizāñ bahār se kam nahīñ

meri zindagi pe na muskura mujhe zindagi ka alam nahin

jise tere gham se ho wasta wo KHizan bahaar se kam nahin

ye ruuh raqs-e-charāġhāñ hai apne halqe meñ

ye jism saaya hai aur saaya Dhal rahā hai miyāñ

ye ruh raqs-e-charaghan hai apne halqe mein

ye jism saya hai aur saya Dhal raha hai miyan

guzar rahī thī zindagī guzar rahī hai zindagī

nasheb ke baġhair bhī farāz ke baġhair bhī

guzar rahi thi zindagi guzar rahi hai zindagi

nasheb ke baghair bhi faraaz ke baghair bhi

aish hī aish hai na sab ġham hai

zindagī ik hasīn sañgam hai

aish hi aish hai na sab gham hai

zindagi ek hasin sangam hai

zindagī se zindagī rūThī rahī

aadmī se aadmī barham rahā

zindagi se zindagi ruThi rahi

aadmi se aadmi barham raha

nashsha thā zindagī kā sharāboñ se tez-tar

ham gir paḌe to maut uThā le ga.ī hameñ

nashsha tha zindagi ka sharabon se tez-tar

hum gir paDe to maut uTha le gai hamein

kyā chāhtī hai ham se hamārī ye zindagī

kyā qarz hai jo ham se adā ho nahīñ rahā

kya chahti hai hum se hamari ye zindagi

kya qarz hai jo hum se ada ho nahin raha

baḌī talāsh se miltī hai zindagī ai dost

qazā kī tarah patā pūchhtī nahīñ aatī

baDi talash se milti hai zindagi ai dost

qaza ki tarah pata puchhti nahin aati

āḳhir ik roz to paivand-e-zamīñ honā hai

jāma-e-zīst nayā aur purānā kaisā

aaKHir ek roz to paiwand-e-zamin hona hai

jama-e-zist naya aur purana kaisa

kaun jiine ke liye martā rahe

lo sambhālo apnī duniyā ham chale

kaun jine ke liye marta rahe

lo sambhaalo apni duniya hum chale

jab nahīñ kuchh e'tibār-e-zindagī

is jahāñ kā shaad kyā nāshād kyā

jab nahin kuchh e'tibar-e-zindagi

is jahan ka shad kya nashad kya

agar hai zindagī ik jashn to nā-mehrbāñ kyoñ hai

fasurda rang meñ Duubī huī har dāstāñ kyoñ hai

agar hai zindagi ek jashn to na-mehrban kyon hai

fasurda rang mein Dubi hui har dastan kyon hai

jo log maut ko zālim qarār dete haiñ

ḳhudā milā.e unheñ zindagī ke māroñ se

jo log maut ko zalim qarar dete hain

KHuda milae unhen zindagi ke maron se

kabhī ḳhirad kabhī dīvāngī ne luuT liyā

tarah tarah se hameñ zindagī ne luuT liyā

kabhi KHirad kabhi diwangi ne luT liya

tarah tarah se hamein zindagi ne luT liya

aap ne is ke fasāne hī sune hote haiñ

aur achānak ye balā aap ke sar hotī hai

aap ne is ke fasane hi sune hote hain

aur achanak ye bala aap ke sar hoti hai

dhuup meñ niklo ghaTāoñ meñ nahā kar dekho

zindagī kyā hai kitāboñ ko haTā kar dekho

dhup mein niklo ghaTaon mein naha kar dekho

zindagi kya hai kitabon ko haTa kar dekho

saarī rusvā.ī zamāne kī gavārā kar ke

zindagī jiite haiñ kuchh log ḳhasāra kar ke

sari ruswai zamane ki gawara kar ke

zindagi jite hain kuchh log KHasara kar ke

gar zindagī meñ mil ga.e phir ittifāq se

pūchheñge apnā haal tirī bebasī se ham

gar zindagi mein mil gae phir ittifaq se

puchhenge apna haal teri bebasi se hum

kis darja dil-shikan the mohabbat ke hādse

ham zindagī meñ phir koī armāñ na kar sake

kis darja dil-shikan the mohabbat ke hadse

hum zindagi mein phir koi arman na kar sake

ġham-o-alam se jo ta.abīr kī ḳhushī maiñ ne

bahut qarīb se dekhī hai zindagī maiñ ne

gham-o-alam se jo tabir ki KHushi main ne

bahut qarib se dekhi hai zindagi main ne

ye kyā kahūñ ki mujh ko kuchh gunāh bhī aziiz haiñ

ye kyuuñ kahūñ ki zindagī savāb ke liye nahīñ

ye kya kahun ki mujh ko kuchh gunah bhi aziz hain

ye kyun kahun ki zindagi sawab ke liye nahin

zindagī sham.a kī mānind jalātā huuñ 'nadīm'

bujh to jā.ūñgā magar subah to kar jā.ūñgā

zindagi shama ki manind jalata hun 'nadim'

bujh to jaunga magar subah to kar jaunga

zindagī bas muskurā ke rah ga.ī

kyoñ hameñ nāhaq rijhā ke rah ga.ī

zindagi bas muskura ke rah gai

kyon hamein nahaq rijha ke rah gai

ijāzat ho to maiñ tasdīq kar luuñ terī zulfoñ se

sunā hai zindagī ik ḳhūb-sūrat daam hai saaqī

ijazat ho to main tasdiq kar lun teri zulfon se

suna hai zindagi ek KHub-surat dam hai saqi

ġhazal us ne chheḌī mujhe saaz denā

zarā umr-e-rafta ko āvāz denā

ghazal us ne chheDi mujhe saz dena

zara umr-e-rafta ko aawaz dena

din raat mai-kade meñ guzartī thī zindagī

'aḳhtar' vo be-ḳhudī ke zamāne kidhar ga.e

din raat mai-kade mein guzarti thi zindagi

'aKHtar' wo be-KHudi ke zamane kidhar gae

ḳhaak aur ḳhuun se ik sham.a jalā.ī hai 'nushūr'

maut se ham ne bhī sīkhī hai hayāt-ārā.ī

KHak aur KHun se ek shama jalai hai 'nushur'

maut se hum ne bhi sikhi hai hayat-arai

maiñ zindagī kā saath nibhātā chalā gayā

har fikr ko dhueñ meñ uḌātā chalā gayā

main zindagi ka sath nibhata chala gaya

har fikr ko dhuen mein uData chala gaya

yaqīñ mujhe bhī hai vo ā.eñge zarūr magar

vafā karegī kahāñ tak ki zindagī hī to hai

yaqin mujhe bhi hai wo aaenge zarur magar

wafa karegi kahan tak ki zindagi hi to hai

vidā.a kartī hai rozāna zindagī mujh ko

maiñ roz maut ke mañjdhār se nikaltā huuñ

widaa karti hai rozana zindagi mujh ko

main roz maut ke manjdhaar se nikalta hun

maut ḳhāmoshī hai chup rahne se chup lag jā.egī

zindagī āvāz hai bāteñ karo bāteñ karo

maut KHamoshi hai chup rahne se chup lag jaegi

zindagi aawaz hai baaten karo baaten karo

bahāne aur bhī hote jo zindagī ke liye

ham ek baar tirī aarzū bhī kho dete

bahane aur bhi hote jo zindagi ke liye

hum ek bar teri aarzu bhi kho dete

vo kūdte uchhalte rangīn pairahan the

ma.asūm qahqahoñ meñ uḌtā gulāl dekhā

wo kudte uchhalte rangin pairahan the

masum qahqahon mein uDta gulal dekha

zindagī hai yā koī tūfān hai!

ham to is jiine ke hāthoñ mar chale

zindagi hai ya koi tufan hai!

hum to is jine ke hathon mar chale

zindagī tujh se har ik saañs pe samjhautā karūñ

shauq jiine kā hai mujh ko magar itnā bhī nahīñ

zindagi tujh se har ek sans pe samjhauta karun

shauq jine ka hai mujh ko magar itna bhi nahin