Sher on Mother

sab ne maanā marne vaalā dahshat-gard aur qātil thā

maañ ne phir bhī qabr pe us kī rāj-dulārā likkhā thā

sab ne mana marne wala dahshat-gard aur qatil tha

man ne phir bhi qabr pe us ki raj-dulara likkha tha

būḌhī maañ kā shāyad lauT aayā bachpan

guḌiyoñ kā ambār lagā kar baiTh ga.ī

buDhi man ka shayad lauT aaya bachpan

guDiyon ka ambar laga kar baiTh gai

sharm aa.ī hai mujhe apne qad-o-qāmat par

maañ ke jab hoñTh na pahoñche mirī peshānī tak

sharm aai hai mujhe apne qad-o-qamat par

man ke jab honTh na pahonche meri peshani tak

duā ko haat uThāte hue laraztā huuñ

kabhī duā nahīñ māñgī thī maañ ke hote hue

dua ko hat uThate hue larazta hun

kabhi dua nahin mangi thi man ke hote hue

bose biivī ke hañsī bachchoñ kī āñkheñ maañ kī

qaid-ḳhāne meñ giraftār samajhiye ham ko

bose biwi ke hansi bachchon ki aankhen man ki

qaid-KHane mein giraftar samajhiye hum ko

maiñ apnī maañ ke vasīle se zinda-tar Thahrūñ

ki vo lahū mire sabr-o-razā meñ raushan hai

main apni man ke wasile se zinda-tar Thahrun

ki wo lahu mere sabr-o-raza mein raushan hai

duur rahtī haiñ sadā un se balā.eñ sāhil

apne maañ baap kī jo roz duā lete haiñ

dur rahti hain sada un se balaen sahil

apne man bap ki jo roz dua lete hain

maiñ ne kal shab chāhatoñ kī sab kitābeñ phaaḌ deñ

sirf ik kāġhaz pe likkhā lafz-e-māñ rahne diyā

main ne kal shab chahaton ki sab kitaben phaD den

sirf ek kaghaz pe likkha lafz-e-man rahne diya

maañ baap aur ustād sab haiñ ḳhudā kī rahmat

hai rok-Tok un kī haq meñ tumhāre ne.amat

man bap aur ustad sab hain KHuda ki rahmat

hai rok-Tok un ki haq mein tumhaare neamat

abhī zinda hai maañ merī mujhe kuchh bhī nahīñ hogā

maiñ ghar se jab nikaltā huuñ duā bhī saath chaltī hai

abhi zinda hai man meri mujhe kuchh bhi nahin hoga

main ghar se jab nikalta hun dua bhi sath chalti hai

ek laḌkā shahr kī raunaq meñ sab kuchh bhuul jaa.e

ek buḌhiyā roz chaukhaT par diyā raushan kare

ek laDka shahr ki raunaq mein sab kuchh bhul jae

ek buDhiya roz chaukhaT par diya raushan kare

maañ mujhe dekh ke nārāz na ho jaa.e kahīñ

sar pe āñchal nahīñ hotā hai to Dar hotā hai

man mujhe dekh ke naraaz na ho jae kahin

sar pe aanchal nahin hota hai to Dar hota hai

shahr ke raste hoñ chāhe gaañv kī pagDañDiyāñ

maañ kī uñglī thaam kar chalnā bahut achchhā lagā

shahr ke raste hon chahe ganw ki pagDanDiyan

man ki ungli tham kar chalna bahut achchha laga

jis ne ik umr dī hai bachchoñ ko

us ke hisse meñ ek din aayā

jis ne ek umr di hai bachchon ko

us ke hisse mein ek din aaya

taaq par juzdān meñ lipTī duā.eñ rah ga.iiñ

chal diye beTe safar par ghar meñ maa.eñ rah ga.iiñ

taq par juzdan mein lipTi duaen rah gain

chal diye beTe safar par ghar mein maen rah gain

is liye chal na sakā koī bhī ḳhanjar mujh par

merī shah-rag pe mirī maañ kī duā rakkhī thī

is liye chal na saka koi bhi KHanjar mujh par

meri shah-rag pe meri man ki dua rakkhi thi

āñkhoñ se māñgne lage paanī vuzū kā ham

kāġhaz pe jab bhī dekh liyā maañ likhā huā

aankhon se mangne lage pani wuzu ka hum

kaghaz pe jab bhi dekh liya man likha hua

shahr meñ aa kar paḌhne vaale bhuul ga.e

kis kī maañ ne kitnā zevar bechā thā

shahr mein aa kar paDhne wale bhul gae

kis ki man ne kitna zewar becha tha

kis shafqat meñ guñdhe hue maulā maañ baap diye

kaisī pyārī rūhoñ ko merī aulād kiyā

kis shafqat mein gundhe hue maula man bap diye

kaisi pyari ruhon ko meri aulad kiya

'munavvar' maañ ke aage yuuñ kabhī khul kar nahīñ ronā

jahāñ buniyād ho itnī namī achchhī nahīñ hotī

'munawwar' man ke aage yun kabhi khul kar nahin rona

jahan buniyaad ho itni nami achchhi nahin hoti

ghar kī is baar mukammal maiñ talāshī lūñgā

ġham chhupā kar mire maañ baap kahāñ rakhte the

ghar ki is bar mukammal main talashi lunga

gham chhupa kar mere man bap kahan rakhte the

hādsoñ kī gard se ḳhud ko bachāne ke liye

maañ ham apne saath bas terī du'ā le jā.eñge

hadson ki gard se KHud ko bachane ke liye

man hum apne sath bas teri du'a le jaenge

shāyad yūñhī simaT sakeñ ghar kī zarūrateñ

'tanvīr' maañ ke haath meñ apnī kamā.ī de

shayad yunhi simaT saken ghar ki zaruraten

'tanwir' man ke hath mein apni kamai de

muqaddas muskurāhaT maañ ke hoñToñ par laraztī hai

kisī bachche kā jab pahlā sipāra ḳhatm hotā hai

muqaddas muskurahaT man ke honTon par larazti hai

kisi bachche ka jab pahla sipara KHatm hota hai

jab tak rahā huuñ dhuup meñ chādar banā rahā

maiñ apnī maañ kā āḳhirī zevar banā rahā

jab tak raha hun dhup mein chadar bana raha

main apni man ka aaKHiri zewar bana raha

diyā hai maañ ne mujhe duudh bhī vuzū kar ke

mahāz-e-jang se maiñ lauT kar na jā.uñgā

diya hai man ne mujhe dudh bhi wuzu kar ke

mahaz-e-jang se main lauT kar na jaunga

din bhar kī mashaqqat se badan chuur hai lekin

maañ ne mujhe dekhā to thakan bhuul ga.ī hai

din bhar ki mashaqqat se badan chur hai lekin

man ne mujhe dekha to thakan bhul gai hai

is tarah mere gunāhoñ ko vo dho detī hai

maañ bahut ġhusse meñ hotī hai to ro detī hai

is tarah mere gunahon ko wo dho deti hai

man bahut ghusse mein hoti hai to ro deti hai

maiñ is se qīmtī shai koī kho nahīñ saktā

'adīl' maañ kī jagah koī ho nahīñ saktā

main is se qimti shai koi kho nahin sakta

'adil' man ki jagah koi ho nahin sakta

jab bhī dekhā mire kirdār pe dhabbā koī

der tak baiTh ke tanhā.ī meñ royā koī

jab bhi dekha mere kirdar pe dhabba koi

der tak baiTh ke tanhai mein roya koi

bahan kā pyaar maañ kī māmtā do chīḳhtī āñkheñ

yahī tohfe the vo jin ko maiñ aksar yaad kartā thā

bahan ka pyar man ki mamta do chiKHti aankhen

yahi tohfe the wo jin ko main aksar yaad karta tha

shaam Dhale ik vīrānī sī saath mire ghar jaatī hai

mujh se pūchho us kī hālat jis kī maañ mar jaatī hai

sham Dhale ek virani si sath mere ghar jati hai

mujh se puchho us ki haalat jis ki man mar jati hai

merī ḳhvāhish hai ki maiñ phir se farishta ho jā.ūñ

maañ se is tarh lipaT jā.ūñ ki bachcha ho jā.ūñ

meri KHwahish hai ki main phir se farishta ho jaun

man se is tarh lipaT jaun ki bachcha ho jaun

mire chehre pe mamtā kī farāvānī chamaktī hai

maiñ būḌhā ho rahā huuñ phir bhī peshānī chamaktī hai

mere chehre pe mamta ki farawani chamakti hai

main buDha ho raha hun phir bhi peshani chamakti hai

maañ kī duā na baap kī shafqat kā saayā hai

aaj apne saath apnā janam din manāyā hai

man ki dua na bap ki shafqat ka saya hai

aaj apne sath apna janam din manaya hai

ai raat mujhe maañ kī tarah god meñ le le

din bhar kī mashaqqat se badan TuuT rahā hai

ai raat mujhe man ki tarah god mein le le

din bhar ki mashaqqat se badan TuT raha hai

kaho kyā mehrbāñ nā-mehrbāñ taqdīr hotī hai

kahā maañ kī duāoñ meñ baḌī tāsīr hotī hai

kaho kya mehrban na-mehrban taqdir hoti hai

kaha man ki duaon mein baDi tasir hoti hai

baap ziina hai jo le jaatā hai ūñchā.ī tak

maañ duā hai jo sadā sāya-figan rahtī hai

bap zina hai jo le jata hai unchai tak

man dua hai jo sada saya-figan rahti hai

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

man ki aaghosh mein kal maut ki aaghosh mein aaj

hum ko duniya mein ye do waqt suhane se mile

havā dukhoñ kī jab aa.ī kabhī ḳhizāñ kī tarah

mujhe chhupā liyā miTTī ne merī maañ kī tarah

hawa dukhon ki jab aai kabhi KHizan ki tarah

mujhe chhupa liya miTTi ne meri man ki tarah

buzurgoñ kā mire dil se abhī tak Dar nahīñ jaatā

ki jab tak jāgtī rahtī hai maañ maiñ ghar nahīñ jaatā

buzurgon ka mere dil se abhi tak Dar nahin jata

ki jab tak jagti rahti hai man main ghar nahin jata

munavvar maañ ke aage yuuñ kabhī khul kar nahīñ ronā

jahāñ buniyād ho itnī namī achchhī nahīñ hotī

munawwar man ke aage yun kabhi khul kar nahin rona

jahan buniyaad ho itni nami achchhi nahin hoti

kitāboñ se nikal kar titliyāñ ġhazleñ sunātī haiñ

tiffin rakhtī hai merī maañ to basta muskurātā hai

kitabon se nikal kar titliyan ghazlen sunati hain

tiffin rakhti hai meri man to basta muskuraata hai

sāmne maañ ke jo hotā huuñ to allāh allāh

mujh ko mahsūs ye hotā hai ki bachcha huuñ abhī

samne man ke jo hota hun to allah allah

mujh ko mahsus ye hota hai ki bachcha hun abhi

surūr-e-jāñ-fazā detī hai āġhosh-e-vatan sab ko

ki jaise bhī hoñ bachche maañ ko pyāre ek jaise haiñ

surur-e-jaan-faza deti hai aaghosh-e-watan sab ko

ki jaise bhi hon bachche man ko pyare ek jaise hain

ab ik rūmāl mere saath kā hai

jo merī vālida ke haath kā hai

ab ek rumal mere sath ka hai

jo meri walida ke hath ka hai

tere dāman meñ sitāre haiñ to hoñge ai falak

mujh ko apnī maañ kī mailī oḌhnī achchhī lagī

tere daman mein sitare hain to honge ai falak

mujh ko apni man ki maili oDhni achchhi lagi

ye aisā qarz hai jo maiñ adā kar hī nahīñ saktā

maiñ jab tak ghar na lauTūñ merī maañ sajde meñ rahtī hai

ye aisa qarz hai jo main ada kar hi nahin sakta

main jab tak ghar na lauTun meri man sajde mein rahti hai

chaltī phirtī huī ā.ankhoñ se azaañ dekhī hai

maiñ ne jannat to nahīñ dekhī hai maañ dekhī hai

chalti phirti hui aaankhon se azan dekhi hai

main ne jannat to nahin dekhi hai man dekhi hai

du'ā.eñ maañ kī pahuñchāne ko mīloñ-mīl jaatī haiñ

ki jab pardes jaane ke liye beTā nikaltā hai

du'aen man ki pahunchane ko milon-mil jati hain

ki jab pardes jaane ke liye beTa nikalta hai