Sher on Mehndi

mehñdī ke dhoke mat rah zālim nigāh kar tū

ḳhuuñ merā dast-o-pā se tere lipaT rahā hai

mehndi ke dhoke mat rah zalim nigah kar tu

KHun mera dast-o-pa se tere lipaT raha hai

ham gunahgāroñ ke kyā ḳhuun kā phīkā thā rañg

mehñdī kis vāste hāthoñ pe rachā.ī pyāre

hum gunahgaron ke kya KHun ka phika tha rang

mehndi kis waste hathon pe rachai pyare

lab-e-nāzuk ke bose luuñ to missī muñh banātī hai

kaf-e-pā ko agar chūmūñ to mehñdī rañg laatī hai

lab-e-nazuk ke bose lun to missi munh banati hai

kaf-e-pa ko agar chumun to mehndi rang lati hai

mal rahe haiñ vo apne ghar mehñdī

ham yahāñ eḌiyāñ ragaḌte haiñ

mal rahe hain wo apne ghar mehndi

hum yahan eDiyan ragaDte hain

mehñdī ne ġhazab donoñ taraf aag lagā dī

talvoñ meñ udhar aur idhar dil meñ lagī hai

mehndi ne ghazab donon taraf aag laga di

talwon mein udhar aur idhar dil mein lagi hai

mehñdī lagāne kā jo ḳhayāl aayā aap ko

sūkhe hue daraḳht hinā ke hare hue

mehndi lagane ka jo KHayal aaya aap ko

sukhe hue daraKHt hina ke hare hue

kushta-e-rañg-e-hinā huuñ maiñ ajab is kā kyā

ki mirī ḳhaak se mehñdī kā shajar paidā ho

kushta-e-rang-e-hina hun main ajab is ka kya

ki meri KHak se mehndi ka shajar paida ho

allāh-re nāzukī ki javāb-e-salām meñ

haath us kā uTh ke rah gayā mehñdī ke bojh se

allah-re nazuki ki jawab-e-salam mein

hath us ka uTh ke rah gaya mehndi ke bojh se

donoñ kā milnā mushkil hai donoñ haiñ majbūr bahut

us ke paañv meñ mehñdī lagī hai mere paañv meñ chhāle haiñ

donon ka milna mushkil hai donon hain majbur bahut

us ke panw mein mehndi lagi hai mere panw mein chhaale hain

mehñdī lagā.e baiThe haiñ kuchh is adā se vo

muTThī meñ un kī de de koī dil nikāl ke

mehndi lagae baiThe hain kuchh is ada se wo

muTThi mein un ki de de koi dil nikal ke