Sher on Gulshan

gulshan meñ na ham hoñge to phir sog hamārā

gul-pairahan o ġhuncha-dahan karte raheñge

gulshan mein na hum honge to phir sog hamara

gul-pairahan o ghuncha-dahan karte rahenge

kyā isī vāste sīñchā thā lahū se apne

jab sañvar jaa.e chaman aag lagā dī jaa.e

kya isi waste sincha tha lahu se apne

jab sanwar jae chaman aag laga di jae

koī samjhegā kyā rāz-e-gulshan

jab tak uljhe na kāñToñ se dāman

koi samjhega kya raaz-e-gulshan

jab tak uljhe na kanTon se daman

vahī gulshan hai lekin vaqt kī parvāz to dekho

koī taa.ir nahīñ pichhle baras ke āshiyānoñ meñ

wahi gulshan hai lekin waqt ki parwaz to dekho

koi tair nahin pichhle baras ke aashiyanon mein

maiñ ne dekhā hai bahāroñ meñ chaman ko jalte

hai koī ḳhvāb kī tābīr batāne vaalā

main ne dekha hai bahaaron mein chaman ko jalte

hai koi KHwab ki tabir batane wala

guloñ meñ rañg bhare bād-e-nau-bahār chale

chale bhī aao ki gulshan kā kārobār chale

gulon mein rang bhare baad-e-nau-bahaar chale

chale bhi aao ki gulshan ka karobar chale

maiñ us gulshan kā bulbul huuñ bahār aane nahīñ paatī

ki sayyād aan kar merā gulistāñ mol lete haiñ

main us gulshan ka bulbul hun bahaar aane nahin pati

ki sayyaad aan kar mera gulistan mol lete hain

ham ko is kī kyā ḳhabar gulshan kā gulshan jal gayā

ham to apnā sirf apnā āshiyāñ dekhā kiye

hum ko is ki kya KHabar gulshan ka gulshan jal gaya

hum to apna sirf apna aashiyan dekha kiye

gulshan kī faqat phūloñ se nahīñ kāñToñ se bhī zīnat hotī hai

jiine ke liye is duniyā meñ ġham kī bhī zarūrat hotī hai

gulshan ki faqat phulon se nahin kanTon se bhi zinat hoti hai

jine ke liye is duniya mein gham ki bhi zarurat hoti hai