Sher on Ada

pahle is meñ ik adā thī naaz thā andāz thā

rūThnā ab to tirī aadat meñ shāmil ho gayā

pahle is mein ek ada thi naz tha andaz tha

ruThna ab to teri aadat mein shamil ho gaya

aap ne tasvīr bhejī maiñ ne dekhī ġhaur se

har adā achchhī ḳhamoshī kī adā achchhī nahīñ

aap ne taswir bheji main ne dekhi ghaur se

har ada achchhi KHamoshi ki ada achchhi nahin

be-ḳhud bhī haiñ hoshiyār bhī haiñ dekhne vaale

in mast nigāhoñ kī adā aur hī kuchh hai

be-KHud bhi hain hoshiyar bhi hain dekhne wale

in mast nigahon ki ada aur hi kuchh hai

aafat to hai vo naaz bhī andāz bhī lekin

martā huuñ maiñ jis par vo adā aur hī kuchh hai

aafat to hai wo naz bhi andaz bhi lekin

marta hun main jis par wo ada aur hi kuchh hai

parda-e-lutf meñ ye zulm-o-sitam kyā kahiye

haa.e zālim tirā andāz-e-karam kyā kahiye

parda-e-lutf mein ye zulm-o-sitam kya kahiye

hae zalim tera andaz-e-karam kya kahiye

adā se dekh lo jaatā rahe gila dil kā

bas ik nigāh pe Thahrā hai faisla dil kā

ada se dekh lo jata rahe gila dil ka

bas ek nigah pe Thahra hai faisla dil ka

lagāvaT kī adā se un kā kahnā paan hāzir hai

qayāmat hai sitam hai dil fidā hai jaan hāzir hai

lagawaT ki ada se un ka kahna pan hazir hai

qayamat hai sitam hai dil fida hai jaan hazir hai

kuchh is adā se mohabbat-shanās honā hai

ḳhushī ke baab meñ mujh ko udaas honā hai

kuchh is ada se mohabbat-shanas hona hai

KHushi ke bab mein mujh ko udas hona hai

umr bhar milne nahīñ detī haiñ ab to ranjisheñ

vaqt ham se ruuTh jaane kī adā tak le gayā

umr bhar milne nahin deti hain ab to ranjishen

waqt hum se ruTh jaane ki ada tak le gaya

phuul kah dene se afsurda koī hotā hai

sab adā.eñ tirī achchhī haiñ nazākat ke sivā

phul kah dene se afsurda koi hota hai

sab adaen teri achchhi hain nazakat ke siwa

adā.eñ dekhne baiThe ho kyā ā.īne meñ apnī

diyā hai jis ne tum jaise ko dil us kā jigar dekho

adaen dekhne baiThe ho kya aaine mein apni

diya hai jis ne tum jaise ko dil us ka jigar dekho

is adā se mujhe salām kiyā

ek hī aan meñ ġhulām kiyā

is ada se mujhe salam kiya

ek hi aan mein ghulam kiya

nigāheñ is qadar qātil ki uff uff

adā.eñ is qadar pyārī ki tauba

nigahen is qadar qatil ki uff uff

adaen is qadar pyari ki tauba

ḳhūb-rū haiñ saikḌoñ lekin nahīñ terā javāb

dilrubā.ī meñ adā meñ naaz meñ andāz meñ

KHub-ru hain saikDon lekin nahin tera jawab

dilrubai mein ada mein naz mein andaz mein

vo kuchh muskurānā vo kuchh jheñp jaanā

javānī adā.eñ sikhātī haiñ kyā kyā

wo kuchh muskurana wo kuchh jhenp jaana

jawani adaen sikhati hain kya kya

is sādgī pe kaun na mar jaa.e ai ḳhudā

laḌte haiñ aur haath meñ talvār bhī nahīñ

is sadgi pe kaun na mar jae ai KHuda

laDte hain aur hath mein talwar bhi nahin

adā adā tirī mauj-e-sharāb ho ke rahī

nigāh-e-mast se duniyā ḳharāb ho ke rahī

ada ada teri mauj-e-sharab ho ke rahi

nigah-e-mast se duniya KHarab ho ke rahi

kare hai adāvat bhī vo is adā se

lage hai ki jaise mohabbat kare hai

kare hai adawat bhi wo is ada se

lage hai ki jaise mohabbat kare hai

jaam le kar mujh se vo kahtā hai apne muñh ko pher

rū-ba-rū yuuñ tere mai piine se sharmāte haiñ ham

jam le kar mujh se wo kahta hai apne munh ko pher

ru-ba-ru yun tere mai pine se sharmate hain hum

bole vo muskurā ke bahut iltijā ke ba.ad

jī to ye chāhtā hai tirī maan jā.iye

bole wo muskura ke bahut iltija ke baad

ji to ye chahta hai teri man jaiye

zamāna husn nazākat balā jafā shoḳhī

simaT ke aa ga.e sab aap kī adāoñ meñ

zamana husn nazakat bala jafa shoKHi

simaT ke aa gae sab aap ki adaon mein

pāmāl kar ke pūchhte haiñ kis adā se vo

is dil meñ aag thī mire talve jhulas ga.e

pamal kar ke puchhte hain kis ada se wo

is dil mein aag thi mere talwe jhulas gae

maar Daalā muskurā kar naaz se

haañ mirī jaañ phir usī andāz se

mar Dala muskura kar naz se

han meri jaan phir usi andaz se

banāvaT vaz.a-dārī meñ ho yā be-sāḳhta-pan meñ

hameñ andāz vo bhātā hai jis meñ kuchh adā nikle

banawaT waza-dari mein ho ya be-saKHta-pan mein

hamein andaz wo bhata hai jis mein kuchh ada nikle

adā aa.ī jafā aa.ī ġhurūr aayā hijāb aayā

hazāroñ āfateñ le kar hasīnoñ par shabāb aayā

ada aai jafa aai ghurur aaya hijab aaya

hazaron aafaten le kar hasinon par shabab aaya

ye adā.eñ ye ishāre ye hasīñ qaul-o-qarār

kitne ādāb ke parde meñ hai inkār kī baat

ye adaen ye ishaare ye hasin qaul-o-qarar

kitne aadab ke parde mein hai inkar ki baat

barq ko abr ke dāman meñ chhupā dekhā hai

ham ne us shoḳh ko majbūr-e-hayā dekhā hai

barq ko abr ke daman mein chhupa dekha hai

hum ne us shoKH ko majbur-e-haya dekha hai

zālim ne kyā nikālī raftār rafta rafta

is chaal par chalegī talvār rafta rafta

zalim ne kya nikali raftar rafta rafta

is chaal par chalegi talwar rafta rafta

hayā se sar jhukā lenā adā se muskurā denā

hasīnoñ ko bhī kitnā sahl hai bijlī girā denā

haya se sar jhuka lena ada se muskura dena

hasinon ko bhi kitna sahl hai bijli gira dena

tanhā vo aa.eñ jaa.eñ ye hai shaan ke ḳhilāf

aanā hayā ke saath hai jaanā adā ke saath

tanha wo aaen jaen ye hai shan ke KHilaf

aana haya ke sath hai jaana ada ke sath

andāz apnā dekhte haiñ aa.ine meñ vo

aur ye bhī dekhte haiñ koī dekhtā na ho

andaz apna dekhte hain aaine mein wo

aur ye bhi dekhte hain koi dekhta na ho

ai tarah-dār-e-ishva-tarāz-e-dayār-e-nāz

ruḳhsat huā huuñ tere liye dil-galī se maiñ

ai tarah-dar-e-ishwa-taraaz-e-dayar-e-naz

ruKHsat hua hun tere liye dil-gali se main

pūchhā jo un se chāñd nikaltā hai kis tarah

zulfoñ ko ruḳh pe Daal ke jhaTkā diyā ki yuuñ

puchha jo un se chand nikalta hai kis tarah

zulfon ko ruKH pe Dal ke jhaTka diya ki yun

ye jo sar nīche kiye baiThe haiñ

jaan kitnoñ kī liye baiThe haiñ

ye jo sar niche kiye baiThe hain

jaan kitnon ki liye baiThe hain

saath shoḳhī ke kuchh hijāb bhī hai

is adā kā kahīñ javāb bhī hai

sath shoKHi ke kuchh hijab bhi hai

is ada ka kahin jawab bhi hai

gul ho mahtāb ho ā.īna ho ḳhurshīd ho miir

apnā mahbūb vahī hai jo adā rakhtā ho

gul ho mahtab ho aaina ho KHurshid ho mir

apna mahbub wahi hai jo ada rakhta ho