Sher on Aahat

ye zulf-bar-dosh kaun aayā ye kis kī aahaT se gul khile haiñ

mahak rahī hai fazā-e-hastī tamām aalam bahār sā hai

ye zulf-bar-dosh kaun aaya ye kis ki aahaT se gul khile hain

mahak rahi hai faza-e-hasti tamam aalam bahaar sa hai

dil par dastak dene kaun aa niklā hai

kis kī aahaT suntā huuñ vīrāne meñ

dil par dastak dene kaun aa nikla hai

kis ki aahaT sunta hun virane mein

shaam Dhale aahaT kī kirneñ phūTī thiiñ

sūraj Duub ke mere ghar meñ niklā thā

sham Dhale aahaT ki kirnen phuTi thin

suraj Dub ke mere ghar mein nikla tha

jise na aane kī qasmeñ maiñ de ke aayā huuñ

usī ke qadmoñ kī aahaT kā intizār bhī hai

jise na aane ki qasmen main de ke aaya hun

usi ke qadmon ki aahaT ka intizar bhi hai

dil ke suune sehn meñ gūñjī aahaT kis ke paañv kī

dhūp-bhare sannāTe meñ āvāz sunī hai chhāñv kī

dil ke sune sehn mein gunji aahaT kis ke panw ki

dhup-bhare sannaTe mein aawaz suni hai chhanw ki

koī āvāz na aahaT na koī halchal hai

aisī ḳhāmoshī se guzre to guzar jā.eñge

koi aawaz na aahaT na koi halchal hai

aisi KHamoshi se guzre to guzar jaenge

koī halchal hai na aahaT na sadā hai koī

dil kī dahlīz pe chup-chāp khaḌā hai koī

koi halchal hai na aahaT na sada hai koi

dil ki dahliz pe chup-chap khaDa hai koi

ye bhī rahā hai kūcha-e-jānāñ meñ apnā rañg

aahaT huī to chāñd darīche meñ aa gayā

ye bhi raha hai kucha-e-jaanan mein apna rang

aahaT hui to chand dariche mein aa gaya

pahle to us kī yaad ne sone nahīñ diyā

phir us kī āhaToñ ne kahā jāgte raho

pahle to us ki yaad ne sone nahin diya

phir us ki aahaTon ne kaha jagte raho

is añdhere meñ na ik gaam bhī ruknā yaaro

ab to ik dūsre kī āhaTeñ kaam ā.eñgī

is andhere mein na ek gam bhi rukna yaro

ab to ek dusre ki aahaTen kaam aaengi

har lahza us ke paañv kī aahaT pe kaan rakh

darvāze tak jo aayā hai andar bhī aa.egā

har lahza us ke panw ki aahaT pe kan rakh

darwaze tak jo aaya hai andar bhi aaega

'aḳhtar' guzarte lamhoñ kī aahaT pe yuuñ na chauñk

is mātamī julūs meñ ik zindagī bhī hai

'aKHtar' guzarte lamhon ki aahaT pe yun na chaunk

is matami julus mein ek zindagi bhi hai

kaun aa.egā yahāñ koī na aayā hogā

merā darvāza havāoñ ne hilāyā hogā

kaun aaega yahan koi na aaya hoga

mera darwaza hawaon ne hilaya hoga

maiñ ne din raat ḳhudā se ye duā māñgī thī

koī aahaT na ho dar par mire jab tū aa.e

main ne din raat KHuda se ye dua mangi thi

koi aahaT na ho dar par mere jab tu aae

aahaT sī koī aa.e to lagtā hai ki tum ho

saaya koī lahrā.e to lagtā hai ki tum ho

aahaT si koi aae to lagta hai ki tum ho

saya koi lahrae to lagta hai ki tum ho

koī dastak koī aahaT na sadā hai koī

duur tak ruuh meñ phailā huā sannāTā hai

koi dastak koi aahaT na sada hai koi

dur tak ruh mein phaila hua sannaTa hai

palaT na jaa.eñ hamesha ko tere āñgan se

gudāz lamhoñ kī be-ḳhvāb āhaToñ se na ruuTh

palaT na jaen hamesha ko tere aangan se

gudaz lamhon ki be-KHwab aahaTon se na ruTh

aaj bhī naqsh haiñ dil par tirī aahaT ke nishāñ

ham ne us raah se auroñ ko guzarne na diyā

aaj bhi naqsh hain dil par teri aahaT ke nishan

hum ne us rah se auron ko guzarne na diya

ḳhāmoshī meñ chāhe jitnā begāna-pan ho

lekin ik aahaT jānī-pahchānī hotī hai

KHamoshi mein chahe jitna begana-pan ho

lekin ek aahaT jaani-pahchani hoti hai

bahut pahle se un qadmoñ kī aahaT jaan lete haiñ

tujhe ai zindagī ham duur se pahchān lete haiñ

bahut pahle se un qadmon ki aahaT jaan lete hain

tujhe ai zindagi hum dur se pahchan lete hain

aahaT bhī agar kī to tah-e-zāt nahīñ kī

lafzoñ ne ka.ī din se koī baat nahīñ kī

aahaT bhi agar ki to tah-e-zat nahin ki

lafzon ne kai din se koi baat nahin ki

kisī aahaT meñ aahaT ke sivā kuchh bhī nahīñ ab

kisī sūrat meñ sūrat ke sivā kyā rah gayā hai

kisi aahaT mein aahaT ke siwa kuchh bhi nahin ab

kisi surat mein surat ke siwa kya rah gaya hai

niiñd aa.e to achānak tirī aahaT sun luuñ

jaag uTThūñ to badan se tirī ḳhushbū aa.e

nind aae to achanak teri aahaT sun lun

jag uTThun to badan se teri KHushbu aae

āhaTeñ sun rahā huuñ yādoñ kī

aaj bhī apne intizār meñ gum

aahaTen sun raha hun yaadon ki

aaj bhi apne intizar mein gum

jab zarā raat huī aur mah o anjum aa.e

bār-hā dil ne ye mahsūs kiyā tum aa.e

jab zara raat hui aur mah o anjum aae

bar-ha dil ne ye mahsus kiya tum aae

apnī aahaT pe chauñktā huuñ maiñ

kis kī duniyā meñ aa gayā huuñ maiñ

apni aahaT pe chaunkta hun main

kis ki duniya mein aa gaya hun main