abhī se vo dāman chhuḌāne lage ho

jo ab tak mire haath aayā nahīñ hai

abhi se wo daman chhuDane lage ho

jo ab tak mere hath aaya nahin hai

jis darja nek hone kī miltī rahī hai daad

us darja nek banñe kā armāñ kabhī na thā

jis darja nek hone ki milti rahi hai dad

us darja nek banne ka arman kabhi na tha

aa.e to dil thā baaġh baaġh aur ga.e to daaġh daaġh

kitnī ḳhushī vo laa.e the kitnā malāl de ga.e

aae to dil tha bagh bagh aur gae to dagh dagh

kitni KHushi wo lae the kitna malal de gae

aur hī vo log haiñ jin ko hai yazdāñ kī talāsh

mujh ko insānoñ kī duniyā meñ hai insāñ kī talāsh

aur hi wo log hain jin ko hai yazdan ki talash

mujh ko insanon ki duniya mein hai insan ki talash

jo log maut ko zālim qarār dete haiñ

ḳhudā milā.e unheñ zindagī ke māroñ se

jo log maut ko zalim qarar dete hain

KHuda milae unhen zindagi ke maron se

kisī kī mehrbānī se mohabbat mutma.in kyā ho

mohabbat to mohabbat se bhī āsūda nahīñ hotī

kisi ki mehrbani se mohabbat mutmain kya ho

mohabbat to mohabbat se bhi aasuda nahin hoti

raat se shikāyat kyā bas tumhīñ se kahnā hai

tum zarā Thahar jaao raat kab Thahartī hai

raat se shikayat kya bas tumhin se kahna hai

tum zara Thahar jao raat kab Thaharti hai

ham se shikāyateñ bajā ham ko bhī hai magar gila

pahle se ham nahīñ agar pahle se aap bhī nahīñ

hum se shikayaten baja hum ko bhi hai magar gila

pahle se hum nahin agar pahle se aap bhi nahin