kab vo suntā hai kahānī merī

aur phir vo bhī zabānī merī

kab wo sunta hai kahani meri

aur phir wo bhi zabani meri

zamāna saḳht kam-āzār hai ba-jān-e-asad

vagarna ham to tavaqqo zyāda rakhte haiñ

zamana saKHt kam-azar hai ba-jaan-e-asad

wagarna hum to tawaqqo zyaada rakhte hain

bulbul ke kārobār pe haiñ ḳhanda-hā-e-gul

kahte haiñ jis ko ishq ḳhalal hai dimāġh kā

bulbul ke karobar pe hain KHanda-ha-e-gul

kahte hain jis ko ishq KHalal hai dimagh ka

mai se ġharaz nashāt hai kis rū-siyāh ko

ik-gūna be-ḳhudī mujhe din raat chāhiye

mai se gharaz nashat hai kis ru-siyah ko

ik-guna be-KHudi mujhe din raat chahiye

dil se miTnā tirī añgusht-e-hinā.ī kā ḳhayāl

ho gayā gosht se nāḳhun kā judā ho jaanā

dil se miTna teri angusht-e-hinai ka KHayal

ho gaya gosht se naKHun ka juda ho jaana

jis zaḳhm kī ho saktī ho tadbīr rafū kī

likh dījiyo yā rab use qismat meñ adū kī

jis zaKHm ki ho sakti ho tadbir rafu ki

likh dijiyo ya rab use qismat mein adu ki

'ġhālib'-e-ḳhasta ke baġhair kaun se kaam band haiñ

roiye zaar zaar kyā kījiye haa.e haa.e kyuuñ

'ghaalib'-e-KHasta ke baghair kaun se kaam band hain

roiye zar zar kya kijiye hae hae kyun

sabza o gul kahāñ se aa.e haiñ

abr kyā chiiz hai havā kyā hai

sabza o gul kahan se aae hain

abr kya chiz hai hawa kya hai

us anjuman-e-nāz kī kyā baat hai 'ġhālib'

ham bhī ga.e vaañ aur tirī taqdīr ko ro aa.e

us anjuman-e-naz ki kya baat hai 'ghaalib'

hum bhi gae wan aur teri taqdir ko ro aae

niiñd us kī hai dimāġh us kā hai rāteñ us kī haiñ

terī zulfeñ jis ke baazū par pareshāñ ho ga.iiñ

nind us ki hai dimagh us ka hai raaten us ki hain

teri zulfen jis ke bazu par pareshan ho gain

in ābloñ se paañv ke ghabrā gayā thā maiñ

jī ḳhush huā hai raah ko pur-ḳhār dekh kar

in aablon se panw ke ghabra gaya tha main

ji KHush hua hai rah ko pur-KHar dekh kar

banā kar faqīroñ kā ham bhes 'ġhālib'

tamāshā-e-ahl-e-karam dekhte haiñ

bana kar faqiron ka hum bhes 'ghaalib'

tamasha-e-ahl-e-karam dekhte hain

ġhalatī-hā-e-mazāmīñ mat pūchh

log naale ko rasā bāñdhte haiñ

ghalati-ha-e-mazamin mat puchh

log nale ko rasa bandhte hain

ham ko ma.alūm hai jannat kī haqīqat lekin

dil ke ḳhush rakhne ko 'ġhālib' ye ḳhayāl achchhā hai

hum ko malum hai jannat ki haqiqat lekin

dil ke KHush rakhne ko 'ghaalib' ye KHayal achchha hai

hue mar ke ham jo rusvā hue kyuuñ na ġharq-e-dariyā

na kabhī janāza uThtā na kahīñ mazār hotā

hue mar ke hum jo ruswa hue kyun na gharq-e-dariya

na kabhi janaza uThta na kahin mazar hota

haiñ aur bhī duniyā meñ suḳhan-var bahut achchhe

kahte haiñ ki 'ġhālib' kā hai andāz-e-bayāñ aur

hain aur bhi duniya mein suKHan-war bahut achchhe

kahte hain ki 'ghaalib' ka hai andaz-e-bayan aur

maut kā ek din muayyan hai

niind kyuuñ raat bhar nahīñ aatī

maut ka ek din muayyan hai

nind kyun raat bhar nahin aati

na satā.ish kī tamannā na sile kī parvā

gar nahīñ haiñ mire ash.ār meñ ma.anī na sahī

na sataish ki tamanna na sile ki parwa

gar nahin hain mere ashaar mein mani na sahi

kah sake kaun ki ye jalvagarī kis kī hai

parda chhoḌā hai vo us ne ki uThā.e na bane

kah sake kaun ki ye jalwagari kis ki hai

parda chhoDa hai wo us ne ki uThae na bane

ik ḳhūñ-chakāñ kafan meñ karoḌoñ banāo haiñ

paḌtī hai aañkh tere shahīdoñ pe huur kī

ek KHun-chakan kafan mein karoDon banao hain

paDti hai aankh tere shahidon pe hur ki

kitne shīrīñ haiñ tere lab ki raqīb

gāliyāñ khā ke be-mazā na huā

kitne shirin hain tere lab ki raqib

galiyan kha ke be-maza na hua

thā zindagī meñ marg kā khaTkā lagā huā

uḌne se pesh-tar bhī mirā rañg zard thā

tha zindagi mein marg ka khaTka laga hua

uDne se pesh-tar bhi mera rang zard tha

vo chiiz jis ke liye ham ko ho bahisht aziiz

sivā.e bāda-e-gulfām-e-mushk-bū kyā hai

wo chiz jis ke liye hum ko ho bahisht aziz

siwae baada-e-gulfam-e-mushk-bu kya hai

gar tujh ko hai yaqīn-e-ijābat duā na maañg

ya.anī baġhair-e-yak-dil-e-be-mudda.ā na maañg

gar tujh ko hai yaqin-e-ijabat dua na mang

yani baghair-e-yak-dil-e-be-muddaa na mang

phūñkā hai kis ne gosh-e-mohabbat meñ ai ḳhudā

afsūn-e-intizār tamannā kaheñ jise

phunka hai kis ne gosh-e-mohabbat mein ai KHuda

afsun-e-intizar tamanna kahen jise

ishrat-e-qatra hai dariyā meñ fanā ho jaanā

dard kā had se guzarnā hai davā ho jaanā

ishrat-e-qatra hai dariya mein fana ho jaana

dard ka had se guzarna hai dawa ho jaana

ātish-e-dozaḳh meñ ye garmī kahāñ

soz-e-ġham-hā-e-nihānī aur hai

aatish-e-dozaKH mein ye garmi kahan

soz-e-gham-ha-e-nihani aur hai

āgahī dām-e-shunīdan jis qadar chāhe bichhā.e

mudda.ā anqā hai apne ālam-e-taqrīr kā

aagahi dam-e-shunidan jis qadar chahe bichhae

muddaa anqa hai apne aalam-e-taqrir ka

bahrā huuñ maiñ to chāhiye duunā ho iltifāt

suntā nahīñ huuñ baat mukarrar kahe baġhair

bahra hun main to chahiye duna ho iltifat

sunta nahin hun baat mukarrar kahe baghair

kaaba kis muñh se jāoge 'ġhālib'

sharm tum ko magar nahīñ aatī

kaba kis munh se jaoge 'ghaalib'

sharm tum ko magar nahin aati

muzmahil ho ga.e qavā ġhālib

vo anāsir meñ e'tidāl kahāñ

muzmahil ho gae qawa ghaalib

wo anasir mein e'tidal kahan

ek ek qatre kā mujhe denā paḌā hisāb

ḳhūn-e-jigar vadī.at-e-mizhgān-e-yār thā

ek ek qatre ka mujhe dena paDa hisab

KHun-e-jigar wadiat-e-mizhgan-e-yar tha

ye lāsh-e-be-kafan 'asad'-e-ḳhasta-jāñ kī hai

haq maġhfirat kare ajab āzād mard thā

ye lash-e-be-kafan 'asad'-e-KHasta-jaan ki hai

haq maghfirat kare ajab aazad mard tha

ham kahāñ ke daanā the kis hunar meñ yaktā the

be-sabab huā 'ġhālib' dushman āsmāñ apnā

hum kahan ke dana the kis hunar mein yakta the

be-sabab hua 'ghaalib' dushman aasman apna

de mujh ko shikāyat kī ijāzat ki sitamgar

kuchh tujh ko maza bhī mire āzār meñ aave

de mujh ko shikayat ki ijazat ki sitamgar

kuchh tujh ko maza bhi mere aazar mein aawe

allāh re zauq-e-dasht-navardī ki ba.ad-e-marg

hilte haiñ ḳhud-ba-ḳhud mire andar kafan ke paañv

allah re zauq-e-dasht-nawardi ki baad-e-marg

hilte hain KHud-ba-KHud mere andar kafan ke panw

baiThā hai jo ki sāya-e-dīvār-e-yār meñ

farmāñ-ravā-e-kishvar-e-hindūstān hai

baiTha hai jo ki saya-e-diwar-e-yar mein

farman-rawa-e-kishwar-e-hindustan hai

koī vīrānī sī vīrānī hai

dasht ko dekh ke ghar yaad aayā

koi virani si virani hai

dasht ko dekh ke ghar yaad aaya

sunte haiñ jo bahisht kī tārīf sab durust

lekin ḳhudā kare vo tirā jalva-gāh ho

sunte hain jo bahisht ki tarif sab durust

lekin KHuda kare wo tera jalwa-gah ho

agle vaqtoñ ke haiñ ye log inheñ kuchh na kaho

jo mai o naġhma ko andoh-rubā kahte haiñ

agle waqton ke hain ye log inhen kuchh na kaho

jo mai o naghma ko andoh-ruba kahte hain

phir usī bevafā pe marte haiñ

phir vahī zindagī hamārī hai

phir usi bewafa pe marte hain

phir wahi zindagi hamari hai

hai ḳhayāl-e-husn meñ husn-e-amal kā sā ḳhayāl

ḳhuld kā ik dar hai merī gor ke andar khulā

hai KHayal-e-husn mein husn-e-amal ka sa KHayal

KHuld ka ek dar hai meri gor ke andar khula

bahut dinoñ meñ taġhāful ne tere paidā kī

vo ik nigah ki ba-zāhir nigāh se kam hai

bahut dinon mein taghaful ne tere paida ki

wo ek nigah ki ba-zahir nigah se kam hai

umr bhar dekhā kiye marne kī raah

mar ga.e par dekhiye dikhlā.eñ kyā

umr bhar dekha kiye marne ki rah

mar gae par dekhiye dikhlaen kya

ganjīna-e-ma.anī kā tilism us ko samajhiye

jo lafz ki 'ġhālib' mire ash.ār meñ aave

ganjina-e-mani ka tilism us ko samajhiye

jo lafz ki 'ghaalib' mere ashaar mein aawe

jaan tum par nisār kartā huuñ

maiñ nahīñ jāntā duā kyā hai

jaan tum par nisar karta hun

main nahin jaanta dua kya hai

tujh se to kuchh kalām nahīñ lekin ai nadīm

merā salām kahiyo agar nāma-bar mile

tujh se to kuchh kalam nahin lekin ai nadim

mera salam kahiyo agar nama-bar mile

ishq ne 'ġhālib' nikammā kar diyā

varna ham bhī aadmī the kaam ke

ishq ne 'ghaalib' nikamma kar diya

warna hum bhi aadmi the kaam ke

tamāshā ki ai mahv-e-ā.īna-dārī

tujhe kis tamannā se ham dekhte haiñ

tamasha ki ai mahw-e-aina-dari

tujhe kis tamanna se hum dekhte hain

ham bhī taslīm kī ḳhū Dāleñge

be-niyāzī tirī aadat hī sahī

hum bhi taslim ki KHu Dalenge

be-niyazi teri aadat hi sahi