ghar ko chhoḌā hai ḳhudā jaane kahāñ jaane ko

ab samajh lījiye TuuTā huā taarā mujh ko

ghar ko chhoDa hai KHuda jaane kahan jaane ko

ab samajh lijiye TuTa hua tara mujh ko

ye insān nādīda ulfat kā maarā

ḳhudā jaane kis kis ko sajda karegā

ye insan nadida ulfat ka mara

KHuda jaane kis kis ko sajda karega

mujhe miTā ke vo yuuñ baiThe muskurāte haiñ

kisī se jaise koī nek kaam ho jaa.e

mujhe miTa ke wo yun baiThe muskuraate hain

kisi se jaise koi nek kaam ho jae

jamā ham karte ga.e chun chun ke tinke baaġh meñ

aur na jaane kis kā kis kā āshiyāñ bantā gayā

jama hum karte gae chun chun ke tinke bagh mein

aur na jaane kis ka kis ka aashiyan banta gaya

ham vahshiyoñ kā maskan kyā pūchhtā hai zālim

sahrā hai to sahrā hai zindāñ hai to zindāñ hai

hum wahshiyon ka maskan kya puchhta hai zalim

sahra hai to sahra hai zindan hai to zindan hai

mirī raat kyuuñ kar kaTegī ilāhī

mujhe din ko taare nazar aa rahe haiñ

meri raat kyun kar kaTegi ilahi

mujhe din ko tare nazar aa rahe hain

kis kā kūcha hai aa gayā huuñ kahāñ

yaañ to kuchh niiñd aa.ī jaatī hai

kis ka kucha hai aa gaya hun kahan

yan to kuchh nind aai jati hai

be-ḳhud aisā kiyā ḳhauf-e-shab-e-tanhā.ī ne

subah se sham.a jalā dī tire saudā.ī ne

be-KHud aisa kiya KHauf-e-shab-e-tanhai ne

subah se shama jala di tere saudai ne

duniyā ko diin diin ko duniyā kareñge ham

tere baneñge ham tujhe apnā kareñge ham

duniya ko din din ko duniya karenge hum

tere banenge hum tujhe apna karenge hum

chune the phuul muqaddar se ban ga.e kāñTe

bahār haa.e hamāre liye bahār nahīñ

chune the phul muqaddar se ban gae kanTe

bahaar hae hamare liye bahaar nahin

do ghaḌī dil ke bahlāne kā sahārā bhī gayā

lījiye aaj tasavvur meñ bhī tanhā.ī hai

do ghaDi dil ke bahlane ka sahaara bhi gaya

lijiye aaj tasawwur mein bhi tanhai hai

kabhī to apnā samajh kar javāb de Daalo

badal badal ke sadā.eñ pukārtā huuñ maiñ

kabhi to apna samajh kar jawab de Dalo

badal badal ke sadaen pukarta hun main

hañsī aane kī baat hai hañs rahā huuñ

mujhe log dīvāna farmā rahe haiñ

hansi aane ki baat hai hans raha hun

mujhe log diwana farma rahe hain

vaa.iz se na pūchhūñgā kabhī mas.ala-e-ishq

maiñ ḳhuub samajhtā huuñ jo irshād kareñge

waiz se na puchhunga kabhi masala-e-ishq

main KHub samajhta hun jo irshad karenge

ab itnā aql se begāna ho gayā huuñ maiñ

guloñ ke shikve sitāroñ se kah rahā huuñ maiñ

ab itna aql se begana ho gaya hun main

gulon ke shikwe sitaron se kah raha hun main

ek muusā the ki un kā zikr har mahfil meñ hai

aur ik maiñ huuñ ki ab tak mere dil kī dil meñ hai

ek musa the ki un ka zikr har mahfil mein hai

aur ek main hun ki ab tak mere dil ki dil mein hai

guloñ se khel rahe haiñ nasīm ke jhoñke

qafas meñ baiThā huā haath mal rahā huuñ maiñ

gulon se khel rahe hain nasim ke jhonke

qafas mein baiTha hua hath mal raha hun main

kījiye kyuuñ murda armānoñ se chheḌ

sone vāloñ ko to sone dījiye

kijiye kyun murda armanon se chheD

sone walon ko to sone dijiye

mohabbat to ham ne bhī kī aur bahut kī

magar husn ko ishq karnā na aayā

mohabbat to hum ne bhi ki aur bahut ki

magar husn ko ishq karna na aaya

khelnā aag ke sho.aloñ se kuchh āsān nahīñ

bas ye ik baat ḳhudā-dād hai parvāne meñ

khelna aag ke shoalon se kuchh aasan nahin

bas ye ek baat KHuda-dad hai parwane mein

aap kī yaad meñ ro.uuñ bhī na maiñ rātoñ ko

huuñ to majbūr magar itnā bhī majbūr nahīñ

aap ki yaad mein roun bhi na main raaton ko

hun to majbur magar itna bhi majbur nahin

huī dīvāngī is darja mash.hūr-e-jahāñ merī

jahāñ do aadmī bhī haiñ chhiḌī hai dāstāñ merī

hui diwangi is darja mashhur-e-jahan meri

jahan do aadmi bhi hain chhiDi hai dastan meri

ek ne.amat tire mahjūr ke haath aa.ī hai

iid kā chāñd charāġh-e-shab-e-tanhā.ī hai

ek neamat tere mahjur ke hath aai hai

id ka chand charagh-e-shab-e-tanhai hai

kam-sinī kyā kam thī is par qahr hai shakkī mizāj

apnā nāvak mere dil se khīñch kar dekhā kiye

kam-sini kya kam thi is par qahr hai shakki mizaj

apna nawak mere dil se khinch kar dekha kiye

phir muñh se are kah kar paimāna girā diije

phir toḌiye dil merā phir lījiye añgḌā.ī

phir munh se are kah kar paimana gira dije

phir toDiye dil mera phir lijiye angDai

ik zamāna ho rahā hai ishq meñ ham se ḳhilāf

kis ke kis ke dil meñ dil Dāleñ ilāhī kyā kareñ

ek zamana ho raha hai ishq mein hum se KHilaf

kis ke kis ke dil mein dil Dalen ilahi kya karen

zulm par zulm aa ga.e ġhālib

aable ābloñ ko chhoḌ ga.e

zulm par zulm aa gae ghaalib

aable aablon ko chhoD gae

shab-e-hijr yuuñ dil ko bahlā rahe haiñ

ki din bhar kī biitī ko dohrā rahe haiñ

shab-e-hijr yun dil ko bahla rahe hain

ki din bhar ki biti ko dohra rahe hain

chhiḌī hai aaj mujh se āsmāñ se

zarā haT jā.iyegā darmiyāñ se

chhiDi hai aaj mujh se aasman se

zara haT jaiyega darmiyan se

miTāne vaale hamārā hī ghar miTānā thā

chaman meñ ek se ek achchhā āshiyānā thā

miTane wale hamara hi ghar miTana tha

chaman mein ek se ek achchha aashiyana tha

vahshat vahshat tirī tafrīh kā sāmāñ hai abhī

ki garebāñ kā mire naam garebāñ hai abhī

wahshat wahshat teri tafrih ka saman hai abhi

ki gareban ka mere nam gareban hai abhi

mirā beḌī pahannā thā ki duniyā kī havā badlī

zamāne kī bahāreñ phaT paḌīñ aa ke gulistāñ par

mera beDi pahanna tha ki duniya ki hawa badli

zamane ki bahaaren phaT paDin aa ke gulistan par

na dil meñ lahū hai na āñkhoñ meñ aañsū

ġhamoñ kī nichoḌī huī āstīñ huuñ

na dil mein lahu hai na aankhon mein aansu

ghamon ki nichoDi hui aastin hun

haiñ sau tarīqe aur bhī ai be-qarār dil

iz.hār-e-shikva shikve ke andāz meñ na ho

hain sau tariqe aur bhi ai be-qarar dil

izhaar-e-shikwa shikwe ke andaz mein na ho

maiñ tinke chuntā phirtā huuñ sayyād tīliyāñ

tayyār ho rahā hai qafas āshiyāñ ke saath

main tinke chunta phirta hun sayyaad tiliyan

tayyar ho raha hai qafas aashiyan ke sath

apnī biitī na kahūñ terī kahānī na kahūñ

phir maza kaahe se paidā karūñ afsāne meñ

apni biti na kahun teri kahani na kahun

phir maza kahe se paida karun afsane mein

dard ho dil meñ to davā kiije

aur jo dil hī na ho to kyā kiije

dard ho dil mein to dawa kije

aur jo dil hi na ho to kya kije

jagmagātī tirī āñkhoñ kī qasam furqat meñ

baḌe dukh detī hai ye tāroñ bharī raat mujhe

jagmagati teri aankhon ki qasam furqat mein

baDe dukh deti hai ye taron bhari raat mujhe

ahl-e-mahshar dekh luuñ qātil ko to pahchān luuñ

bholī-bhālī shakl thī aur kuchh bhalā sā naam thā

ahl-e-mahshar dekh lun qatil ko to pahchan lun

bholi-bhaali shakl thi aur kuchh bhala sa nam tha

vo to kahiye aap kī ulfat meñ dil bahlā rahā

varna duniyā chaar din bhī rahne ke qābil na thī

wo to kahiye aap ki ulfat mein dil bahla raha

warna duniya chaar din bhi rahne ke qabil na thi

mujhe to baḳhshiye aur jiine diije

mubārak aap hī ko aap kā dil

mujhe to baKHshiye aur jine dije

mubarak aap hi ko aap ka dil

tafrīq husn-o-ishq ke andāz meñ na ho

lafzoñ meñ farq ho magar āvāz meñ na ho

tafriq husn-o-ishq ke andaz mein na ho

lafzon mein farq ho magar aawaz mein na ho

ġham meñ kuchh ġham kā mashġhalā kiije

dard kī dard se davā kiije

gham mein kuchh gham ka mashghala kije

dard ki dard se dawa kije

kuchh abr ko bhī zid hai 'manzar' mirī tauba se

jab ahd kiyā maiñ ne ghanghor ghaTā chhā.ī

kuchh abr ko bhi zid hai 'manzar' meri tauba se

jab ahd kiya main ne ghanghor ghaTa chhai

jaane vaale jā ḳhudā hāfiz magar ye soch le

kuchh se kuchh ho jā.egī dīvāngī tere baġhair

jaane wale ja KHuda hafiz magar ye soch le

kuchh se kuchh ho jaegi diwangi tere baghair

māñgne par kyā na degā tāqat-e-sabr-o-sukūn

jis ne be māñge atā kar dī pareshānī mujhe

mangne par kya na dega taqat-e-sabr-o-sukun

jis ne be mange ata kar di pareshani mujhe

muddatoñ ba.ad kabhī ai nazar aane vaale

iid kā chāñd na dekhā tirī sūrat dekhī

muddaton baad kabhi ai nazar aane wale

id ka chand na dekha teri surat dekhi

burā ho ishq kā sab kuchh samajh rahā huuñ maiñ

banā rahā hai koī ban rahā huuñ dīvāna

bura ho ishq ka sab kuchh samajh raha hun main

bana raha hai koi ban raha hun diwana

saada varaq javāb meñ ik lā ke de gayā

dīvāna jāntā hai mirā nāma-bar mujhe

sada waraq jawab mein ek la ke de gaya

diwana jaanta hai mera nama-bar mujhe

dāman-o-jeb-o-garebāñ kā nahīñ koī malāl

ġham ye hai dast-e-junūñ kal ke liye kaam nahīñ

daman-o-jeb-o-gareban ka nahin koi malal

gham ye hai dast-e-junun kal ke liye kaam nahin