mohabbat aur majnūñ ham to saudā is ko kahte haiñ

fidā lailā pe thā āñkhoñ kā andhā is ko kahte haiñ

mohabbat aur majnun hum to sauda is ko kahte hain

fida laila pe tha aankhon ka andha is ko kahte hain

dil churā kar le gayā thā koī shaḳhs

pūchhne se fā.eda, thā koī shaḳhs

dil chura kar le gaya tha koi shaKHs

puchhne se faeda, tha koi shaKHs

dushman ke ghar se chal ke dikhā do judā judā

ye bāñkpan kī chaal ye nāz-o-adā kī hai

dushman ke ghar se chal ke dikha do juda juda

ye bankpan ki chaal ye naz-o-ada ki hai

nāma-bar ye to kahī baat pate kī tū ne

zikr us bazm meñ rahtā to hai akasr apnā

nama-bar ye to kahi baat pate ki tu ne

zikr us bazm mein rahta to hai akasr apna

dil huā jaan huī un kī bhalā kyā qīmat

aisī chīzoñ ke kahīñ daam diye jaate haiñ

dil hua jaan hui un ki bhala kya qimat

aisi chizon ke kahin dam diye jate hain

tum ko āshufta-mizājoñ kī ḳhabar se kyā kaam

tum sañvārā karo baiThe hue gesū apne

tum ko aashufta-mizajon ki KHabar se kya kaam

tum sanwara karo baiThe hue gesu apne

hameñ piine se matlab hai jagah kī qaid kyā 'beḳhud'

usī kā naam jannat rakh diyā botal jahāñ rakh dī

hamein pine se matlab hai jagah ki qaid kya 'beKHud'

usi ka nam jannat rakh diya botal jahan rakh di

dil vo kāfir hai ki mujh ko na diyā chiin kabhī

bevafā tū bhī use le ke pashemāñ hogā

dil wo kafir hai ki mujh ko na diya chin kabhi

bewafa tu bhi use le ke pasheman hoga

takiya haTtā nahīñ pahlū se ye kyā hai 'beḳhud'

koī botal to nahīñ tum ne chhupā rakkhī hai

takiya haTta nahin pahlu se ye kya hai 'beKHud'

koi botal to nahin tum ne chhupa rakkhi hai

baat vo kahiye ki jis baat ke sau pahlū hoñ

koī pahlū to rahe baat badalne ke liye

baat wo kahiye ki jis baat ke sau pahlu hon

koi pahlu to rahe baat badalne ke liye

dil vo kāfir hai ki mujh ko na diyā chain kabhī

bevafā tū bhī ise le ke pashemāñ hogā

dil wo kafir hai ki mujh ko na diya chain kabhi

bewafa tu bhi ise le ke pasheman hoga

kuchh tarah rindoñ ne dī kuchh mohtasib bhī dab gayā

chheḌ aapas meñ sar-e-bāzār ho kar rah ga.ī

kuchh tarah rindon ne di kuchh mohtasib bhi dab gaya

chheD aapas mein sar-e-bazar ho kar rah gai

sun ke saarī dāstān-e-rañj-o-ġham

kah diyā us ne ki phir ham kyā kareñ

sun ke sari dastan-e-ranj-o-gham

kah diya us ne ki phir hum kya karen

jhūTā jo kahā maiñ ne to sharmā ke vo bole

allāh bigāḌe na banī baat kisī kī

jhuTa jo kaha main ne to sharma ke wo bole

allah bigaDe na bani baat kisi ki

ab aap koī kaam sikhā dījiye ham ko

ma.alūm huā ishq ke qābil to nahīñ ham

ab aap koi kaam sikha dijiye hum ko

malum hua ishq ke qabil to nahin hum

dī qasam vasl meñ us but ko ḳhudā kī to kahā

tujh ko aatā hai ḳhudā yaad hamāre hote

di qasam wasl mein us but ko KHuda ki to kaha

tujh ko aata hai KHuda yaad hamare hote

mahfil vahī makān vahī aadmī vahī

yā ham na.e haiñ yā tirī aadat badal ga.ī

mahfil wahi makan wahi aadmi wahi

ya hum nae hain ya teri aadat badal gai

maut aa rahī hai va.ade pe yā aa rahe ho tum

kam ho rahā hai dard dil-e-be-qarār kā

maut aa rahi hai wade pe ya aa rahe ho tum

kam ho raha hai dard dil-e-be-qarar ka

chalne kī nahīñ aaj koī ghaat kisī kī

sunñe ke nahīñ vasl meñ ham baat kisī kī

chalne ki nahin aaj koi ghat kisi ki

sunne ke nahin wasl mein hum baat kisi ki

dil to lete ho magar ye bhī rahe yaad tumheñ

jo hamārā na huā kab vo tumhārā hogā

dil to lete ho magar ye bhi rahe yaad tumhein

jo hamara na hua kab wo tumhaara hoga

savāl-e-vasl par kuchh soch kar us ne kahā mujh se

abhī va.ada to kar sakte nahīñ haiñ ham magar dekho

sawal-e-wasl par kuchh soch kar us ne kaha mujh se

abhi wada to kar sakte nahin hain hum magar dekho

adā.eñ dekhne baiThe ho kyā ā.īne meñ apnī

diyā hai jis ne tum jaise ko dil us kā jigar dekho

adaen dekhne baiThe ho kya aaine mein apni

diya hai jis ne tum jaise ko dil us ka jigar dekho

muñh meñ vaa.iz ke bhī bhar aatā hai paanī aksar

jab kabhī tazkira-e-jām-e-sharāb aatā hai

munh mein waiz ke bhi bhar aata hai pani aksar

jab kabhi tazkira-e-jam-e-sharab aata hai

dil mohabbat se bhar gayā 'beḳhud'

ab kisī par fidā nahīñ hotā

dil mohabbat se bhar gaya 'beKHud'

ab kisi par fida nahin hota

aap hoñ ham hoñ mai-e-nāb ho tanhā.ī ho

dil meñ rah rah ke ye armān chale aate haiñ

aap hon hum hon mai-e-nab ho tanhai ho

dil mein rah rah ke ye arman chale aate hain

raah meñ baiThā huuñ maiñ tum sañg-e-rah samjho mujhe

aadmī ban jā.ūñgā kuchh Thokareñ khāne ke ba.ad

rah mein baiTha hun main tum sang-e-rah samjho mujhe

aadmi ban jaunga kuchh Thokaren khane ke baad

aap ko rañj huā aap ke dushman ro.e

maiñ pashemān huā haal sunā kar apnā

aap ko ranj hua aap ke dushman roe

main pasheman hua haal suna kar apna

aap sharmā ke na farmā.eñ hameñ yaad nahīñ

ġhair kā zikr hai ye aap kī rūdād nahīñ

aap sharma ke na farmaen hamein yaad nahin

ghair ka zikr hai ye aap ki rudad nahin

javāb soch ke vo dil meñ muskurāte haiñ

abhī zabān pe merī savāl bhī to na thā

jawab soch ke wo dil mein muskuraate hain

abhi zaban pe meri sawal bhi to na tha

riñd-mashrab koī 'beḳhud' sā na hogā vallāh

pī ke masjid hī meñ ye ḳhāna-ḳharāb aatā hai

rind-mashrab koi 'beKHud' sa na hoga wallah

pi ke masjid hi mein ye KHana-KHarab aata hai

chashm-e-bad-dūr vo bhole bhī haiñ nādāñ bhī haiñ

zulm bhī mujh pe kabhī soch-samajh kar na huā

chashm-e-bad-dur wo bhole bhi hain nadan bhi hain

zulm bhi mujh pe kabhi soch-samajh kar na hua

aa.ina dekh kar vo ye samjhe

mil gayā husn-e-be-misāl hameñ

aaina dekh kar wo ye samjhe

mil gaya husn-e-be-misal hamein

saḳht-jāñ huuñ mujhe ik vaar se kyā hotā hai

aisī choTeñ koī do-chār to aane diije

saKHt-jaan hun mujhe ek war se kya hota hai

aisi choTen koi do-chaar to aane dije

na dekhe hoñge rind-e-lā-ubālī tum ne 'beḳhud' se

ki aise log ab āñkhoñ se ojhal hote jaate haiñ

na dekhe honge rind-e-la-ubaali tum ne 'beKHud' se

ki aise log ab aankhon se ojhal hote jate hain

'beḳhud' zarūr raat ko so.e ho pī ke tum

ye to kaho namāz paḌhī yā qazā huī

'beKHud' zarur raat ko soe ho pi ke tum

ye to kaho namaz paDhi ya qaza hui

na dekhnā kabhī ā.īna bhuul kar dekho

tumhāre husn kā paidā javāb kar degā

na dekhna kabhi aaina bhul kar dekho

tumhaare husn ka paida jawab kar dega

dil meñ phir vasl ke armān chale aate haiñ

mere rūThe hue mehmān chale aate haiñ

dil mein phir wasl ke arman chale aate hain

mere ruThe hue mehman chale aate hain

'beḳhud' to mar miTe jo kahā us ne naaz se

ik sher aa gayā hai hameñ aap kā pasand

'beKHud' to mar miTe jo kaha us ne naz se

ek sher aa gaya hai hamein aap ka pasand

ye kah ke mere sāmne Taalā raqīb ko

mujh se kabhī kī jaan na pahchān jā.iye

ye kah ke mere samne Tala raqib ko

mujh se kabhi ki jaan na pahchan jaiye

vo kuchh muskurānā vo kuchh jheñp jaanā

javānī adā.eñ sikhātī haiñ kyā kyā

wo kuchh muskurana wo kuchh jhenp jaana

jawani adaen sikhati hain kya kya

tumhārī yaad merā dil ye donoñ chalte purze haiñ

jo in meñ se koī miTtā mujhe pahle miTā jaatā

tumhaari yaad mera dil ye donon chalte purze hain

jo in mein se koi miTta mujhe pahle miTa jata

baat karne kī shab-e-vasl ijāzat de do

mujh ko dam bhar ke liye ġhair kī qismat de do

baat karne ki shab-e-wasl ijazat de do

mujh ko dam bhar ke liye ghair ki qismat de do

tirī teġh kā laal kar dūñgā muñh

jo ye khelne mujh se aa.egī rañg

teri tegh ka lal kar dunga munh

jo ye khelne mujh se aaegi rang

tumhāre haath ḳhālī jeb ḳhālī zulf ḳhālī thī

na the tum chor dil ke lo idhar dekho ye kyā niklā

tumhaare hath KHali jeb KHali zulf KHali thi

na the tum chor dil ke lo idhar dekho ye kya nikla

is jabīn-e-araq-afshāñ pe na chuniye afshāñ

ye sitāre kahīñ mil jaa.eñ na sayyāroñ meñ

is jabin-e-araq-afshan pe na chuniye afshan

ye sitare kahin mil jaen na sayyaron mein

paḌhe jaao 'beḳhud' ġhazal par ġhazal

vo but ban ga.e haiñ sune jā.eñge

paDhe jao 'beKHud' ghazal par ghazal

wo but ban gae hain sune jaenge

jaadū hai yā tilism tumhārī zabān meñ

tum jhuuT kah rahe the mujhe e'tibār thā

jadu hai ya tilism tumhaari zaban mein

tum jhuT kah rahe the mujhe e'tibar tha

apne jalve kā vo ḳhud aap tamāshā.ī hai

ā.īne us ne lagā rakkhe haiñ dīvāroñ meñ

apne jalwe ka wo KHud aap tamashai hai

aaine us ne laga rakkhe hain diwaron mein

hameñ islām se itnā ta'alluq hai abhī baaqī

butoñ se jab bigaḌtī hai ḳhudā ko yaad karte haiñ

hamein islam se itna ta'alluq hai abhi baqi

buton se jab bigaDti hai KHuda ko yaad karte hain

bole vo muskurā ke bahut iltijā ke ba.ad

jī to ye chāhtā hai tirī maan jā.iye

bole wo muskura ke bahut iltija ke baad

ji to ye chahta hai teri man jaiye