ham hī un ko baam pe laa.e aur hamīñ mahrūm rahe

parda hamāre naam se uTThā aañkh laḌā.ī logoñ ne

hum hi un ko baam pe lae aur hamin mahrum rahe

parda hamare nam se uTTha aankh laDai logon ne

'zafar' aadmī us ko na jāniyegā vo ho kaisā hī sāhab-e-fahm-o-zakā

jise aish meñ yād-e-ḳhudā na rahī jise taish meñ ḳhauf-e-ḳhudā na rahā

'zafar' aadmi us ko na jaaniyega wo ho kaisa hi sahab-e-fahm-o-zaka

jise aish mein yaad-e-KHuda na rahi jise taish mein KHauf-e-KHuda na raha

ab kī jo rāh-e-mohabbat meñ uThā.ī taklīf

saḳht hotī hameñ manzil kabhī aisī to na thī

ab ki jo rah-e-mohabbat mein uThai taklif

saKHt hoti hamein manzil kabhi aisi to na thi

in hasratoñ se kah do kahīñ aur jā baseñ

itnī jagah kahāñ hai dil-e-dāġh-dār meñ

in hasraton se kah do kahin aur ja basen

itni jagah kahan hai dil-e-dagh-dar mein

tamannā hai ye dil meñ jab talak hai dam meñ dam apne

'zafar' muñh se hamāre naam us kā dam-ba-dam nikle

tamanna hai ye dil mein jab talak hai dam mein dam apne

'zafar' munh se hamare nam us ka dam-ba-dam nikle

mehnat se hai azmat ki zamāne meñ nagīñ ko

be-kāvish-e-sīna na kabhī nāmvarī dī

mehnat se hai azmat ki zamane mein nagin ko

be-kawish-e-sina na kabhi namwari di

kitnā hai bad-nasīb 'zafar' dafn ke liye

do gaz zamīn bhī na milī kū-e-yār meñ

kitna hai bad-nasib 'zafar' dafn ke liye

do gaz zamin bhi na mili ku-e-yar mein

idhar ḳhayāl mire dil meñ zulf kā guzrā

udhar vo khātā huā dil meñ pech-o-tāb aayā

idhar KHayal mere dil mein zulf ka guzra

udhar wo khata hua dil mein pech-o-tab aaya

jā kahiyo merā nasīm-e-sahar

mirā chain gayā mirī niiñd ga.ī

ja kahiyo mera nasim-e-sahar

mera chain gaya meri nind gai

ḳhvāb merā hai ain bedārī

maiñ to us meñ bhī dekhtā kuchh huuñ

KHwab mera hai ain bedari

main to us mein bhi dekhta kuchh hun

burā.ī yā bhalā.ī go hai apne vāste lekin

kisī ko kyuuñ kaheñ ham bad ki bad-goī se kyā hāsil

burai ya bhalai go hai apne waste lekin

kisi ko kyun kahen hum bad ki bad-goi se kya hasil

ham apnā ishq chamkā.eñ tum apnā husn chamkāo

ki hairāñ dekh kar aalam hameñ bhī ho tumheñ bhī ho

hum apna ishq chamkaen tum apna husn chamkao

ki hairan dekh kar aalam hamein bhi ho tumhein bhi ho

bharī hai dil meñ jo hasrat kahūñ to kis se kahūñ

sune hai kaun musībat kahūñ to kis se kahūñ

bhari hai dil mein jo hasrat kahun to kis se kahun

sune hai kaun musibat kahun to kis se kahun

ye qissa vo nahīñ tum jis ko qissa-ḳhvāñ se suno

mire fasāna-e-ġham ko mirī zabāñ se suno

ye qissa wo nahin tum jis ko qissa-KHwan se suno

mere fasana-e-gham ko meri zaban se suno

koī kyuuñ kisī kā lubhā.e dil koī kyā kisī se lagā.e dil

vo jo bechte the davā-e-dil vo dukān apnī baḌhā ga.e

koi kyun kisi ka lubhae dil koi kya kisi se lagae dil

wo jo bechte the dawa-e-dil wo dukan apni baDha gae

na kohkan hai na majnūñ ki the mire hamdard

maiñ apnā dard-e-mohabbat kahūñ to kis se kahūñ

na kohkan hai na majnun ki the mere hamdard

main apna dard-e-mohabbat kahun to kis se kahun

pā-e-kūbāñ koī zindāñ meñ nayā hai majnūñ

aatī āvāz-e-salāsil kabhī aisī to na thī

pa-e-kuban koi zindan mein naya hai majnun

aati aawaz-e-salasil kabhi aisi to na thi

hamdamo dil ke lagāne meñ kaho lagtā hai kyā

par chhuḌānā is kā mushkil hai lagānā sahl hai

hamdamo dil ke lagane mein kaho lagta hai kya

par chhuDana is ka mushkil hai lagana sahl hai

auroñ ke bal pe bal na kar itnā na chal nikal

bal hai to bal ke bal pe tū kuchh apne bal ke chal

auron ke bal pe bal na kar itna na chal nikal

bal hai to bal ke bal pe tu kuchh apne bal ke chal

na thī haal kī jab hameñ apne ḳhabar rahe dekhte auroñ ke aib o hunar

paḌī apnī burā.iyoñ par jo nazar to nigāh meñ koī burā na rahā

na thi haal ki jab hamein apne KHabar rahe dekhte auron ke aib o hunar

paDi apni buraiyon par jo nazar to nigah mein koi bura na raha

laḌā kar aañkh us se ham ne dushman kar liyā apnā

nigah ko naaz ko andāz ko abrū ko mizhgāñ ko

laDa kar aankh us se hum ne dushman kar liya apna

nigah ko naz ko andaz ko abru ko mizhgan ko

na durveshoñ kā ḳhirqa chāhiye na tāj-e-shāhānā

mujhe to hosh de itnā rahūñ maiñ tujh pe dīvānā

na durweshon ka KHirqa chahiye na taj-e-shahana

mujhe to hosh de itna rahun main tujh pe diwana

hāl-e-dil kyuuñ kar kareñ apnā bayāñ achchhī tarah

rū-ba-rū un ke nahīñ chaltī zabāñ achchhī tarah

haal-e-dil kyun kar karen apna bayan achchhi tarah

ru-ba-ru un ke nahin chalti zaban achchhi tarah

daulat-e-duniyā nahīñ jaane kī hargiz tere saath

baad tere sab yahīñ ai be-ḳhabar baT jā.egī

daulat-e-duniya nahin jaane ki hargiz tere sath

baad tere sab yahin ai be-KHabar baT jaegi

tum ne kiyā na yaad kabhī bhuul kar hameñ

ham ne tumhārī yaad meñ sab kuchh bhulā diyā

tum ne kiya na yaad kabhi bhul kar hamein

hum ne tumhaari yaad mein sab kuchh bhula diya

kyā taab kyā majāl hamārī ki bosa leñ

lab ko tumhāre lab se milā kar kahe baġhair

kya tab kya majal hamari ki bosa len

lab ko tumhaare lab se mila kar kahe baghair

mere surḳh lahū se chamkī kitne hāthoñ meñ mehñdī

shahr meñ jis din qatl huā maiñ iid manā.ī logoñ ne

mere surKH lahu se chamki kitne hathon mein mehndi

shahr mein jis din qatl hua main id manai logon ne

dekh dil ko mire o kāfir-e-be-pīr na toḌ

ghar hai allāh kā ye is kī to tāmīr na toḌ

dekh dil ko mere o kafir-e-be-pir na toD

ghar hai allah ka ye is ki to tamir na toD

bulbul ko bāġhbāñ se na sayyād se gila

qismat meñ qaid likkhī thī fasl-e-bahār meñ

bulbul ko baghban se na sayyaad se gila

qismat mein qaid likkhi thi fasl-e-bahaar mein

ḳhāksārī ke liye garche banāyā thā mujhe

kaash ḳhāk-e-dar-e-jānāna banāyā hotā

KHaksari ke liye garche banaya tha mujhe

kash KHak-e-dar-e-jaanana banaya hota

tū kahīñ ho dil-e-dīvāna vahāñ pahuñchegā

sham.a hogī jahāñ parvāna vahāñ pahuñchegā

tu kahin ho dil-e-diwana wahan pahunchega

shama hogi jahan parwana wahan pahunchega

sab miTā deñ dil se haiñ jitnī ki us meñ ḳhvāhisheñ

gar hameñ mālūm ho kuchh us kī ḳhvāhish aur hai

sab miTa den dil se hain jitni ki us mein KHwahishen

gar hamein malum ho kuchh us ki KHwahish aur hai

jo tū ho saaf to kuchh maiñ bhī saaf tujh se kahūñ

tire hai dil meñ kudūrat kahūñ to kis se kahūñ

jo tu ho saf to kuchh main bhi saf tujh se kahun

tere hai dil mein kudurat kahun to kis se kahun

lagtā nahīñ hai dil mirā ujḌe dayār meñ

kis kī banī hai ālam-e-nā-pā.edār meñ

lagta nahin hai dil mera ujDe dayar mein

kis ki bani hai aalam-e-na-paedar mein

yaar thā gulzār thā bād-e-sabā thī maiñ na thā

lā.eq-e-pābos-e-jānāñ kyā hinā thī maiñ na thā

yar tha gulzar tha baad-e-saba thi main na tha

laeq-e-pabos-e-jaanan kya hina thi main na tha

mohabbat ke ye ma.anī haiñ ki maiñ ne

vahī chāhā ki jo kuchh tū ne chāhā

mohabbat ke ye mani hain ki main ne

wahi chaha ki jo kuchh tu ne chaha

ham ye to nahīñ kahte ki ġham kah nahīñ sakte

par jo sabab-e-ġhum hai vo ham kah nahīñ sakte

hum ye to nahin kahte ki gham kah nahin sakte

par jo sabab-e-ghum hai wo hum kah nahin sakte

saham kar ai 'zafar' us shoḳh kamāñ-dār se kah

khīñch kar dekh mire siine se tū tiir na toḌ

saham kar ai 'zafar' us shoKH kaman-dar se kah

khinch kar dekh mere sine se tu tir na toD

ġhazab hai ki dil meñ to rakkho kudūrat

karo muñh pe ham se safā.ī kī bāteñ

ghazab hai ki dil mein to rakkho kudurat

karo munh pe hum se safai ki baaten

le gayā chhīn ke kaun aaj tirā sabr o qarār

be-qarārī tujhe ai dil kabhī aisī to na thī

le gaya chhin ke kaun aaj tera sabr o qarar

be-qarari tujhe ai dil kabhi aisi to na thi

baat karnī mujhe mushkil kabhī aisī to na thī

jaisī ab hai tirī mahfil kabhī aisī to na thī

baat karni mujhe mushkil kabhi aisi to na thi

jaisi ab hai teri mahfil kabhi aisi to na thi

itnā na apne jaame se bāhar nikal ke chal

duniyā hai chal-chalāv kā rasta sambhal ke chal

itna na apne jame se bahar nikal ke chal

duniya hai chal-chalaw ka rasta sambhal ke chal

na kuchh ham hañs ke sīkhe haiñ na kuchh ham ro ke sīkhe haiñ

jo kuchh thoḌā sā sīkhe haiñ tumhāre ho ke sīkhe haiñ

na kuchh hum hans ke sikhe hain na kuchh hum ro ke sikhe hain

jo kuchh thoDa sa sikhe hain tumhaare ho ke sikhe hain

ho gayā jis din se apne dil par us ko iḳhtiyār

iḳhtiyār apnā gayā be-iḳhtiyārī rah ga.ī

ho gaya jis din se apne dil par us ko iKHtiyar

iKHtiyar apna gaya be-iKHtiyari rah gai

ai vaa.e inqalāb zamāne ke jaur se

dillī 'zafar' ke haath se pal meñ nikal ga.ī

ai wae inqalab zamane ke jaur se

dilli 'zafar' ke hath se pal mein nikal gai

but-parastī jis se hove haq-parastī ai 'zafar'

kyā kahūñ tujh se ki vo tarz-e-parastish aur hai

but-parasti jis se howe haq-parasti ai 'zafar'

kya kahun tujh se ki wo tarz-e-parastish aur hai

na dūñgā dil use maiñ ye hamesha kahtā thā

vo aaj le hī gayā aur 'zafar' se kuchh na huā

na dunga dil use main ye hamesha kahta tha

wo aaj le hi gaya aur 'zafar' se kuchh na hua

na mujh ko kahne kī tāqat kahūñ to kyā ahvāl

na us ko sunñe kī fursat kahūñ to kis se kahūñ

na mujh ko kahne ki taqat kahun to kya ahwal

na us ko sunne ki fursat kahun to kis se kahun

maiñ sisaktā rah gayā aur mar ga.e farhād o qais

kyā unhī donoñ ke hisse meñ qazā thī maiñ na thā

main sisakta rah gaya aur mar gae farhad o qais

kya unhi donon ke hisse mein qaza thi main na tha

'zafar' badal ke radīf aur tū ġhazal vo sunā

ki jis kā tujh se har ik sher intiḳhāb huā

'zafar' badal ke radif aur tu ghazal wo suna

ki jis ka tujh se har ek sher intiKHab hua