agar kār-e-ulfat ko mushkil samajh luuñ

to kyā tark-e-ulfat meñ āsāniyāñ haiñ

agar kar-e-ulfat ko mushkil samajh lun

to kya tark-e-ulfat mein aasaniyan hain

vo kāfir-nigāheñ ḳhudā kī panāh

jidhar phir ga.iiñ faisla ho gayā

wo kafir-nigahen KHuda ki panah

jidhar phir gain faisla ho gaya

dīdār kī talab ke tarīqoñ se be-ḳhabar

dīdār kī talab hai to pahle nigāh maañg

didar ki talab ke tariqon se be-KHabar

didar ki talab hai to pahle nigah mang

talab-e-āshiq-e-sādiq meñ asar hotā hai

go zarā der meñ hotā hai magar hotā hai

talab-e-ashiq-e-sadiq mein asar hota hai

go zara der mein hota hai magar hota hai

ham ko na mil sakā to faqat ik sukūn-e-dil

ai zindagī vagarna zamāne meñ kyā na thā

hum ko na mil saka to faqat ek sukun-e-dil

ai zindagi wagarna zamane mein kya na tha

banda-parvar maiñ vo banda huuñ ki bahr-e-bandagī

jis ke aage sar jhukā dūñgā ḳhudā ho jā.egā

banda-parwar main wo banda hun ki bahr-e-bandagi

jis ke aage sar jhuka dunga KHuda ho jaega

afsos be-shumār suḳhan-hā-e-guftanī

ḳhauf-e-fasād-e-ḳhalq se nā-gufta rah ga.e

afsos be-shumar suKHan-ha-e-guftani

KHauf-e-fasad-e-KHalq se na-gufta rah gae

sazā.eñ to har haal meñ lāzmī thiiñ

ḳhatā.eñ na kar ke pashemāniyāñ haiñ

sazaen to har haal mein lazmi thin

KHataen na kar ke pashemaniyan hain

kise fursat ki farz-e-ḳhidmat-e-ulfat bajā laa.e

na tum bekār baiThe ho na ham bekār baiThe haiñ

kise fursat ki farz-e-KHidmat-e-ulfat baja lae

na tum bekar baiThe ho na hum bekar baiThe hain