aql meñ jo ghir gayā lā-intihā kyūñkar huā

jo samā meñ aa gayā phir vo ḳhudā kyūñkar huā

aql mein jo ghir gaya la-intiha kyunkar hua

jo sama mein aa gaya phir wo KHuda kyunkar hua

college se aa rahī hai sadā paas paas kī

ohdoñ se aa rahī hai sadā duur duur kī

college se aa rahi hai sada pas pas ki

ohdon se aa rahi hai sada dur dur ki

paḌ jaa.eñ mire jism pe laakh aable 'akbar'

paḌh kar jo koī phūñk de april may june

paD jaen mere jism pe lakh aable 'akbar'

paDh kar jo koi phunk de april may june

īmān bechne pe haiñ ab sab tule hue

lekin ḳharīdo ho jo aligarh ke bhaav se

iman bechne pe hain ab sab tule hue

lekin KHarido ho jo aligarh ke bhaw se

hañgāma hai kyuuñ barpā thoḌī sī jo pī lī hai

Daakā to nahīñ maarā chorī to nahīñ kī hai

hangama hai kyun barpa thoDi si jo pi li hai

Daka to nahin mara chori to nahin ki hai

rahtā hai ibādat meñ hameñ maut kā khaTkā

ham yād-e-ḳhudā karte haiñ, kar le na ḳhudā yaad

rahta hai ibaadat mein hamein maut ka khaTka

hum yaad-e-KHuda karte hain, kar le na KHuda yaad

ishva bhī hai shoḳhī bhī tabassum bhī hayā bhī

zālim meñ aur ik baat hai is sab ke sivā bhī

ishwa bhi hai shoKHi bhi tabassum bhi haya bhi

zalim mein aur ek baat hai is sab ke siwa bhi

ham kyā kaheñ ahbāb kyā kār-e-numāyāñ kar ga.e

B.A hue naukar hue pension milī phir mar ga.e

hum kya kahen ahbab kya kar-e-numayan kar gae

BA hue naukar hue pension mili phir mar gae

ḳhilāf-e-shar.a kabhī shaiḳh thūktā bhī nahīñ

magar añdhere ujāle meñ chūktā bhī nahīñ

KHilaf-e-shara kabhi shaiKH thukta bhi nahin

magar andhere ujale mein chukta bhi nahin

aa.ī hogī kisī ko hijr meñ maut

mujh ko to niiñd bhī nahīñ aatī

aai hogi kisi ko hijr mein maut

mujh ko to nind bhi nahin aati

dil vo hai ki fariyād se labrez hai har vaqt

ham vo haiñ ki kuchh muñh se nikalne nahīñ dete

dil wo hai ki fariyaad se labrez hai har waqt

hum wo hain ki kuchh munh se nikalne nahin dete

har zarra chamaktā hai anvār-e-ilāhī se

har saañs ye kahtī hai ham haiñ to ḳhudā bhī hai

har zarra chamakta hai anwar-e-ilahi se

har sans ye kahti hai hum hain to KHuda bhi hai

mere havās ishq meñ kyā kam haiñ muntashir

majnūñ kā naam ho gayā qismat kī baat hai

mere hawas ishq mein kya kam hain muntashir

majnun ka nam ho gaya qismat ki baat hai

leaderoñ kī dhuum hai aur follower koī nahīñ

sab to general haiñ yahāñ āḳhir sipāhī kaun hai

leaderon ki dhum hai aur follower koi nahin

sab to general hain yahan aaKHir sipahi kaun hai

javānī kī duā laḌkoñ ko nā-haq log dete haiñ

yahī laḌke miTāte haiñ javānī ko javāñ ho kar

jawani ki dua laDkon ko na-haq log dete hain

yahi laDke miTate hain jawani ko jawan ho kar

lagāvaT kī adā se un kā kahnā paan hāzir hai

qayāmat hai sitam hai dil fidā hai jaan hāzir hai

lagawaT ki ada se un ka kahna pan hazir hai

qayamat hai sitam hai dil fida hai jaan hazir hai

in ko kyā kaam hai muravvat se apnī ruḳh se ye muñh na moḌeñge

jaan shāyad farishte chhoḌ bhī deñ doctor fees ko na chhoḌeñge

in ko kya kaam hai murawwat se apni ruKH se ye munh na moDenge

jaan shayad farishte chhoD bhi den doctor fees ko na chhoDenge

masjid kā hai ḳhayāl na parvā-e-church hai

jo kuchh hai ab to college-o-teacher meñ ḳharch hai

masjid ka hai KHayal na parwa-e-church hai

jo kuchh hai ab to college-o-teacher mein KHarch hai

log kahte haiñ badaltā hai zamāna sab ko

mard vo haiñ jo zamāne ko badal dete haiñ

log kahte hain badalta hai zamana sab ko

mard wo hain jo zamane ko badal dete hain

ġhazab hai vo ziddī baḌe ho ga.e

maiñ leTā to uTh ke khaḌe ho ga.e

ghazab hai wo ziddi baDe ho gae

main leTa to uTh ke khaDe ho gae

kamar-e-yār hai bārīkī se ġhā.eb har chand

magar itnā to kahūñgā ki vo ma.adūm nahīñ

kamar-e-yar hai bariki se ghaeb har chand

magar itna to kahunga ki wo madum nahin

naaz kyā is pe jo badlā hai zamāne ne tumheñ

mard haiñ vo jo zamāne ko badal dete haiñ

naz kya is pe jo badla hai zamane ne tumhein

mard hain wo jo zamane ko badal dete hain

un kī āñkhoñ kī lagāvaT se hazar ai 'akbar'

diin se kartī hai dil ko yahī ġhammāz judā

un ki aankhon ki lagawaT se hazar ai 'akbar'

din se karti hai dil ko yahi ghammaz juda

ka.abe se jo but nikle bhī to kyā ka.aba hī gayā jo dil se nikal

afsos ki but bhī ham se chhuTe qabze se ḳhudā kā ghar bhī gayā

kabe se jo but nikle bhi to kya kaba hi gaya jo dil se nikal

afsos ki but bhi hum se chhuTe qabze se KHuda ka ghar bhi gaya

tahsīn ke laa.eq tirā har sher hai 'akbar'

ahbāb kareñ bazm meñ ab vaah kahāñ tak

tahsin ke laeq tera har sher hai 'akbar'

ahbab karen bazm mein ab wah kahan tak

sayyad kī sarguzisht ko haalī se pūchhiye

ġhāzī miyāñ kā haal Dafālī se pūchhiye

sayyad ki sarguzisht ko haali se puchhiye

ghazi miyan ka haal Dafali se puchhiye

butoñ ke pahle bande the misoñ ke ab hue ḳhādim

hameñ har ahd meñ mushkil rahā hai bā-ḳhudā honā

buton ke pahle bande the mison ke ab hue KHadim

hamein har ahd mein mushkil raha hai ba-KHuda hona

akbar dabe nahīñ kisī sultāñ kī fauj se

lekin shahīd ho ga.e biivī kī nauj se

akbar dabe nahin kisi sultan ki fauj se

lekin shahid ho gae biwi ki nauj se

kyā hī rah rah ke tabī.at mirī ghabrātī hai

maut aatī hai shab-e-hijr na niiñd aatī hai

kya hi rah rah ke tabiat meri ghabraati hai

maut aati hai shab-e-hijr na nind aati hai

shaiḳh jī ghar se na nikle aur mujh se kah diyā

aap b-a paas haiñ aur banda biibī paas hai

shaiKH ji ghar se na nikle aur mujh se kah diya

aap b-a pas hain aur banda bibi pas hai

urūj-e-qaumī zavāl-e-qaumī ḳhudā kī qudrat ke haiñ karishme

hamesha radd-o-badal ke andar ye amr political rahā hai

uruj-e-qaumi zawal-e-qaumi KHuda ki qudrat ke hain karishme

hamesha radd-o-badal ke andar ye amr political raha hai

merī ye bechainiyāñ aur un kā kahnā naaz se

hañs ke tum se bol to lete haiñ aur ham kyā kareñ

meri ye bechainiyan aur un ka kahna naz se

hans ke tum se bol to lete hain aur hum kya karen

maza hai spēch kā dinner meñ ḳhabar ye chhaptī hai pionēr meñ

falak kī gardish ke saath hī saath kaam yāroñ kā chal rahā hai

maza hai speech ka dinner mein KHabar ye chhapti hai pioneer mein

falak ki gardish ke sath hi sath kaam yaron ka chal raha hai

duḳhtar-e-raz ne uThā rakkhī hai aafat sar par

ḳhairiyat guzrī ki añgūr ke beTā na huā

duKHtar-e-raz ne uTha rakkhi hai aafat sar par

KHairiyat guzri ki angur ke beTa na hua

ab to hai ishq-e-butāñ meñ zindagānī kā maza

jab ḳhudā kā sāmnā hogā to dekhā jā.egā

ab to hai ishq-e-butan mein zindagani ka maza

jab KHuda ka samna hoga to dekha jaega

haqīqī aur majāzī shā.erī meñ farq ye paayā

ki vo jaame se bāhar hai ye pājāme se bāhar hai

haqiqi aur majazi shaeri mein farq ye paya

ki wo jame se bahar hai ye pajame se bahar hai

ġhamza nahīñ hotā ki ishārā nahīñ hotā

aañkh un se jo miltī hai to kyā kyā nahīñ hotā

ghamza nahin hota ki ishaara nahin hota

aankh un se jo milti hai to kya kya nahin hota

lipaT bhī jā na ruk 'akbar' ġhazab kī beauty hai

nahīñ nahīñ pe na jā ye hayā kī duty hai

lipaT bhi ja na ruk 'akbar' ghazab ki beauty hai

nahin nahin pe na ja ye haya ki duty hai

asar ye tere anfās-e-masīhā.ī kā hai 'akbar'

allahabad se lañgDā chalā lahore tak pahuñchā

asar ye tere anfas-e-masihai ka hai 'akbar'

allahabad se langDa chala lahore tak pahuncha

aah jo dil se nikālī jā.egī

kyā samajhte ho ki ḳhālī jā.egī

aah jo dil se nikali jaegi

kya samajhte ho ki KHali jaegi

ḳhudā se maañg jo kuchh māñgnā hai ai 'akbar'

yahī vo dar hai ki zillat nahīñ savāl ke ba.ad

KHuda se mang jo kuchh mangna hai ai 'akbar'

yahi wo dar hai ki zillat nahin sawal ke baad

da.avā bahut baḌā hai riyāzī meñ aap ko

tūl-e-shab-e-firāq ko to naap dījiye

dawa bahut baDa hai riyazi mein aap ko

tul-e-shab-e-firaq ko to nap dijiye

bas jaan gayā maiñ tirī pahchān yahī hai

tū dil meñ to aatā hai samajh meñ nahīñ aatā

bas jaan gaya main teri pahchan yahi hai

tu dil mein to aata hai samajh mein nahin aata

qaum ke ġham meñ dinner khāte haiñ hukkām ke saath

rañj leader ko bahut hai magar ārām ke saath

qaum ke gham mein dinner khate hain hukkaam ke sath

ranj leader ko bahut hai magar aaram ke sath

ta.alluq āshiq o māshūq kā to lutf rakhtā thā

maze ab vo kahāñ baaqī rahe biivī miyāñ ho kar

talluq aashiq o mashuq ka to lutf rakhta tha

maze ab wo kahan baqi rahe biwi miyan ho kar

nazar un kī rahī college ke bas ilmī favā.ed par

girā ke chupke chupke bijliyāñ diinī aqā.ed par

nazar un ki rahi college ke bas ilmi fawaed par

gira ke chupke chupke bijliyan dini aqaed par

shaiḳh apnī rag ko kyā kareñ reshe ko kyā kareñ

maz.hab ke jhagḌe chhoḌeñ to peshe ko kyā kareñ

shaiKH apni rag ko kya karen reshe ko kya karen

mazhab ke jhagDe chhoDen to peshe ko kya karen

is qadar thā khaTmaloñ kā chārpā.ī meñ hujūm

vasl kā dil se mire armān ruḳhsat ho gayā

is qadar tha khaTmalon ka chaarpai mein hujum

wasl ka dil se mere arman ruKHsat ho gaya

hue is qadar mohazzab kabhī ghar kā muñh na dekhā

kaTī umr hoTaloñ meñ mare aspatāl jā kar

hue is qadar mohazzab kabhi ghar ka munh na dekha

kaTi umr hoTalon mein mare aspatal ja kar

siine se lagā.eñ tumheñ armān yahī hai

jiine kā mazā hai to mirī jaan yahī hai

sine se lagaen tumhein arman yahi hai

jine ka maza hai to meri jaan yahi hai