aa dekh ki mere āñsuoñ meñ

ye kis kā jamāl aa gayā hai

aa dekh ki mere aansuon mein

ye kis ka jamal aa gaya hai

ḳhazīne jaañ ke luTāne vaale diloñ meñ basne kī aas le kar

sunā hai kuchh log aise guzre jo ghar se aa.e na ghar ga.e haiñ

KHazine jaan ke luTane wale dilon mein basne ki aas le kar

suna hai kuchh log aise guzre jo ghar se aae na ghar gae hain

jis kī jānib 'adā' nazar na uThī

haal us kā bhī mere haal sā thā

jis ki jaanib 'ada' nazar na uThi

haal us ka bhi mere haal sa tha

sadiyoñ se mire paañv tale jannat-e-insāñ

maiñ jannat-e-insāñ kā patā DhūñDh rahī huuñ

sadiyon se mere panw tale jannat-e-insan

main jannat-e-insan ka pata DhunDh rahi hun

mastī bharī havāoñ ke jhoñke na pūchhiye

fitrat hai aaj sāġhar-o-mīnā liye hue

masti bhari hawaon ke jhonke na puchhiye

fitrat hai aaj saghar-o-mina liye hue

agar sach itnā zālim hai to ham se jhuuT hī bolo

hameñ aatā hai patjhaḌ ke dinoñ gul-bār ho jaanā

agar sach itna zalim hai to hum se jhuT hi bolo

hamein aata hai patjhaD ke dinon gul-bar ho jaana

bolte haiñ diloñ ke sannāTe

shor sā ye jo chār-sū hai abhī

bolte hain dilon ke sannaTe

shor sa ye jo chaar-su hai abhi

hoñToñ pe kabhī un ke mirā naam hī aa.e

aa.e to sahī bar-sar-e-ilzām hī aa.e

honTon pe kabhi un ke mera nam hi aae

aae to sahi bar-sar-e-ilzam hi aae

kin manziloñ luTe haiñ mohabbat ke qāfile

insāñ zamīñ pe aaj ġharīb-ul-vatan sā hai

kin manzilon luTe hain mohabbat ke qafile

insan zamin pe aaj gharib-ul-watan sa hai

mizāj-o-martaba-e-chashm-e-nam ko pahchāne

jo tujh ko dekh ke aa.e vo ham ko pahchāne

mizaj-o-martaba-e-chashm-e-nam ko pahchane

jo tujh ko dekh ke aae wo hum ko pahchane

koī baat ḳhvāb-o-ḳhayāl kī jo karo to vaqt kaTegā ab

hameñ mausamoñ ke mizāj par koī e'tibār kahāñ rahā

koi baat KHwab-o-KHayal ki jo karo to waqt kaTega ab

hamein mausamon ke mizaj par koi e'tibar kahan raha

na hotā ḳhānumāñ to ḳhānumāñ-barbād kyoñ hotī

'adā' ye rang laa.ī ārzū-e-āshiyāñ merī

na hota KHanuman to KHanuman-barbaad kyon hoti

'ada' ye rang lai aarzu-e-ashiyan meri

payām-e-zindagī-e-nau na ban sakīñ sad haif

ye uudī uudī ghaTā.eñ ye bhīgī bhīgī bahār

payam-e-zindagi-e-nau na ban sakin sad haif

ye udi udi ghaTaen ye bhigi bhigi bahaar

riit bhī apnī rut bhī apnī

dil rasm-e-duniyā kyā jaane

rit bhi apni rut bhi apni

dil rasm-e-duniya kya jaane

log be-mehr na hote hoñge

vahm sā dil ko huā thā shāyad

log be-mehr na hote honge

wahm sa dil ko hua tha shayad

bujhī huī haiñ nigāheñ ġhubār hai ki dhuāñ

vo rāsta hai ki apnā bhī naqsh-e-pā na mile

bujhi hui hain nigahen ghubar hai ki dhuan

wo rasta hai ki apna bhi naqsh-e-pa na mile

kaTtā kahāñ tavīl thā rātoñ kā silsila

sūraj mirī nigāh kī sachchā.iyoñ meñ thā

kaTta kahan tawil tha raaton ka silsila

suraj meri nigah ki sachchaiyon mein tha

haath kāñToñ se kar liye zaḳhmī

phuul bāloñ meñ ik sajāne ko

hath kanTon se kar liye zaKHmi

phul baalon mein ek sajaane ko

ḳhalish-e-tīr-e-be-panāh ga.ī

lījiye un se rasm-o-rāh ga.ī

KHalish-e-tir-e-be-panah gai

lijiye un se rasm-o-rah gai

matā-e-dard parakhnā to bas kī baat nahīñ

jo tujh ko dekh ke aa.e vo ham ko pahchāne

mata-e-dard parakhna to bas ki baat nahin

jo tujh ko dekh ke aae wo hum ko pahchane

ye phir kis ne duzdīda nazroñ se dekhā

machalne lage saiñkaḌoñ shoḳh armāñ

ye phir kis ne duzdida nazron se dekha

machalne lage sainkaDon shoKH arman

bas ek baar manāyā thā jashn-e-mahrūmī

phir us ke baad koī ibtilā nahīñ aa.ī

bas ek bar manaya tha jashn-e-mahrumi

phir us ke baad koi ibtila nahin aai

aap hī markaz-e-nigāh rahe

jaane ko chār-sū nigāh ga.ī

aap hi markaz-e-nigah rahe

jaane ko chaar-su nigah gai

vo be-naqāb sāmne aa.eñ bhī ab to kyā

dīvāngī ko hosh kī fursat nahīñ rahī

wo be-naqab samne aaen bhi ab to kya

diwangi ko hosh ki fursat nahin rahi

phir nigāhoñ ko aazmā liije

phir vafāoñ pe ishtibāh rahe

phir nigahon ko aazma lije

phir wafaon pe ishtibah rahe

jo charāġh saare bujhā chuke unheñ intizār kahāñ rahā

ye sukūñ kā daur-e-shadīd hai koī be-qarār kahāñ rahā

jo charagh sare bujha chuke unhen intizar kahan raha

ye sukun ka daur-e-shadid hai koi be-qarar kahan raha

huā yuuñ ki phir mujhe zindagī ne basar kiyā

koī din the jab mujhe har nazāra hasīñ milā

hua yun ki phir mujhe zindagi ne basar kiya

koi din the jab mujhe har nazara hasin mila

koī taa.ir idhar nahīñ aatā

kaisī taqsīr is makāñ se huī

koi tair idhar nahin aata

kaisi taqsir is makan se hui

vo tishnagī thī ki shabnam ko hoñT tarse haiñ

vo aab huuñ ki muqayyad guhar guhar meñ rahūñ

wo tishnagi thi ki shabnam ko honT tarse hain

wo aab hun ki muqayyad guhar guhar mein rahun

tū ne mizhgāñ uThā ke dekhā bhī

shahr ḳhālī na thā makīnoñ se

tu ne mizhgan uTha ke dekha bhi

shahr KHali na tha makinon se

shāyad kisī ne yaad kiyā hai hameñ 'adā'

kyoñ varna ashk mā.il-e-tūfāñ hai aaj phir

shayad kisi ne yaad kiya hai hamein 'ada'

kyon warna ashk mail-e-tufan hai aaj phir

kis ko ḳhabar haiñ kitne bahakte hue qadam

maḳhmūr añkhḌiyoñ kā sahārā liye hue

kis ko KHabar hain kitne bahakte hue qadam

maKHmur ankhDiyon ka sahaara liye hue

aur kuchh der lab pe aah rahe

aur kuchh un se rasm-o-rāh rahe

aur kuchh der lab pe aah rahe

aur kuchh un se rasm-o-rah rahe

varna insān mar gayā hotā

koī be-nām justujū hai abhī

warna insan mar gaya hota

koi be-nam justuju hai abhi

kāñTā sā jo chubhā thā vo lau de gayā hai kyā

ghultā huā lahū meñ ye ḳhurshīd sā hai kyā

kanTa sa jo chubha tha wo lau de gaya hai kya

ghulta hua lahu mein ye KHurshid sa hai kya

sab se baḌā fareb hai ḳhud zindagī 'adā'

is hīla-jū ke saath haiñ ham bhī bahāna-sāz

sab se baDa fareb hai KHud zindagi 'ada'

is hila-ju ke sath hain hum bhi bahana-saz

ye kis ne naqāb apne ruḳh se ulaT dī

gale mil rahe haiñ baham kufr-o-īmāñ

ye kis ne naqab apne ruKH se ulaT di

gale mil rahe hain baham kufr-o-iman

sajde taḌap rahe haiñ jabīn-e-niyāz meñ

sar haiñ kisī kī zulf kā saudā liye hue

sajde taDap rahe hain jabin-e-niyaz mein

sar hain kisi ki zulf ka sauda liye hue

vo kaisī aas thī adā jo kū-ba-kū liye phirī

vo kuchh to thā jo dil ko aaj tak kabhū milā nahīñ

wo kaisi aas thi ada jo ku-ba-ku liye phiri

wo kuchh to tha jo dil ko aaj tak kabhu mila nahin

ḳhāmushī se huī fuġhāñ se huī

ibtidā rañj kī kahāñ se huī

KHamushi se hui fughan se hui

ibtida ranj ki kahan se hui

gul par kyā kuchh biit ga.ī hai

albelā jhoñkā kyā jaane

gul par kya kuchh bit gai hai

albela jhonka kya jaane

hazār kos nigāhoñ se dil kī manzil tak

koī qarīb se dekhe to ham ko pahchāne

hazar kos nigahon se dil ki manzil tak

koi qarib se dekhe to hum ko pahchane

jo dil meñ thī nigāh sī nigāh meñ kiran sī thī

vo dāstāñ ulajh ga.ī vazāhatoñ ke darmiyāñ

jo dil mein thi nigah si nigah mein kiran si thi

wo dastan ulajh gai wazahaton ke darmiyan

idhar bhī ik nazar ai jalva-e-rangīn-o-begāna

tulū-e-māh kā hai muntazir merā siyah-ḳhāna

idhar bhi ek nazar ai jalwa-e-rangin-o-begana

tulu-e-mah ka hai muntazir mera siyah-KHana

be-navā haiñ ki tujhe saut-o-navā bhī dī hai

jis ne dil toḌ diye us kī duā bhī dī hai

be-nawa hain ki tujhe saut-o-nawa bhi di hai

jis ne dil toD diye us ki dua bhi di hai

maiñ āñdhiyoñ ke paas talāsh-e-sabā meñ huuñ

tum mujh se pūchhte ho mirā hausla hai kyā

main aandhiyon ke pas talash-e-saba mein hun

tum mujh se puchhte ho mera hausla hai kya

abhī sahīfa-e-jāñ par raqam bhī kyā hogā

abhī to yaad bhī be-sāḳhta nahīñ aa.ī

abhi sahifa-e-jaan par raqam bhi kya hoga

abhi to yaad bhi be-saKHta nahin aai

hamāre shahr ke logoñ kā ab ahvāl itnā hai

kabhī aḳhbār paḌh lenā kabhī aḳhbār ho jaanā

hamare shahr ke logon ka ab ahwal itna hai

kabhi aKHbar paDh lena kabhi aKHbar ho jaana

ummīd kā gharauñdā pal meñ girā diyā hai

tujh ko bhī kyā kisī ne dil se bhulā diyā hai

ummid ka gharaunda pal mein gira diya hai

tujh ko bhi kya kisi ne dil se bhula diya hai

āmāda-e-karam hai ye kis kī nigāh-e-nāz

dil shikva-e-sitam se pashemāñ hai aaj kyoñ

aamada-e-karam hai ye kis ki nigah-e-naz

dil shikwa-e-sitam se pasheman hai aaj kyon