تو کہیں بیٹھ اور حکم چلا

ہم جو ہیں تیرا بوجھ ڈھونے کو

گو فراموشی کی تکمیل ہوا چاہتی ہے

پھر بھی کہہ دو کہ ہمیں یاد وہ آیا نہ کرے

جس کام میں ہم نے ہاتھ ڈالا

وہ کام محال ہو گیا ہے

میں ٹھہرتا گیا رفتہ رفتہ

اور یہ دل اپنی روانی میں رہا

کہیں کوئی چراغ جلتا ہے

کچھ نہ کچھ روشنی رہے گی ابھی

مرکز جاں تو وہی تو ہے مگر تیرے سوا

لوگ ہیں اور بھی اس یاد پرانی میں کہیں

یہ یقیں یہ گماں ہی ممکن ہے

تجھ سے ملنا یہاں ہی ممکن ہے

یہ داغ عشق جو مٹتا بھی ہے چمکتا بھی ہے

یہ زخم ہے کہ نشاں ہے مجھے نہیں معلوم

بھر لائے ہیں ہم آنکھ میں رکھنے کو مقابل

اک خواب تمنا تری غفلت کے برابر

کبھی تو ایسا ہے جیسے کہیں پہ کچھ بھی نہیں

کبھی یہ لگتا ہے جیسے یہاں وہاں کوئی ہے

یاد بھی تیری مٹ گئی دل سے

اور کیا رہ گیا ہے ہونے کو

یوں ہی نمٹا دیا ہے جس کو تو نے

وہ قصہ مختصر ایسا نہیں تھا

ہر رخ ہے کہیں اپنے خد و خال سے باہر

ہر لفظ ہے کچھ اپنے معانی سے زیادہ

ہم یقیناً یہاں نہیں ہوں گے

غالباً زندگی رہے گی ابھی

فراق و وصل سے ہٹ کر کوئی رشتہ ہمارا ہے

کہ اس کو چھوڑ پاتا ہوں نہ اس کو تھام رکھتا ہوں

جو بھی یکجا ہے بکھرتا نظر آتا ہے مجھے

جانے یوں ہے بھی کہ ایسا نظر آتا ہے مجھے

یہ اونٹ اور کسی کے ہیں دشت میرا ہے

سوار میرے نہیں سارباں نہیں میرا

ہر ایک آنکھ میں ہوتی ہے منتظر کوئی آنکھ

ہر ایک دل میں کہیں کچھ جگہ نکلتی ہے

گنجائش افسوس نکل آتی ہے ہر روز

مصروف نہیں رہتا ہوں فرصت کے برابر

ڈھنگ کے ایک ٹھکانے کے لیے

گھر کا گھر نقل مکانی میں رہا

قصے سے ترے میری کہانی سے زیادہ

پانی میں ہے کیا اور بھی پانی سے زیادہ