زندہ باد اے وطن

زندہ باد اے وطن زندہ باد اے وطن

تجھ سے آباد ہے زندگی کا چمن

تیرے اتر ہمالہ ترا پاسباں

تیرے دکھن میں ہے ہند ساگر رواں

تیرے پورب میں ہے دیش بنگلہ جواں

تیرے پچھم بحیرہ عرب نگہباں

تیری دھرتی پہ بہتی رہی گنگ و جمن

زندہ باد اے وطن زندہ باد اے وطن

تیرے سانچے میں گوتم سا انساں ڈھلا

تیری دھرتی پہ نانک بھی پیدا ہوا

تیری آغوش میں مرلی والا پلا

تیرے گلشن میں اسلام پھولا پھلا

تیرے پہلو میں سب ہی رہے ہیں مگن

زندہ باد اے وطن زندہ باد اے وطن

تجھ پہ بہتوں نے آ کر حکومت بھی کی

سیکڑوں نے بلا وجہ نفرت بھی کی

کچھ تو وہ تھے جنہوں نے شرارت بھی کی

ہیں کروڑوں جنہوں نے محبت بھی کی

تجھ پہ قربان کیوں کر نہ ہو جان و تن

زندہ باد اے وطن زندہ باد اے وطن

تو بھگت سنگھ کی آنکھوں کا تارا بنا

ٹیپو سلطان کا تو دلارا بنا

بوس کا ہر قدم پر سہارا بنا

تو محمد علی کا بھی پیارا بنا

جان دی پر کسی نے نہ توڑا وچن

زندہ باد اے وطن زندہ باد اے وطن

گود لینا سدا تیری ریتی رہی

پنج شیل آج تک تیری نیتی رہی

تجھ سے سچائی دنیا میں جیتی رہی

تجھ سے ناگن سدا دودھ پیتی رہی

تجھ سے سیکھا اہنسا کا سب نے چلن

زندہ باد اے وطن زندہ باد اے وطن

تجھ پہ گاندھی جواہر نے رکھی نظر

تیری حسرتؔ تلکؔ نے سدا لی خبر

جان دے کے ہوئے تجھ پہ لاکھوں امر

اندرا نے سنوارا تھا تجھ کو مگر

سب نے مل کر بنایا ہے تجھ کو دلہن

زندہ باد اے وطن زندہ باد اے وطن