ye shahr apne harifon se haara thoDi hai

ye shahr apne harīfoñ se haarā thoḌī hai

ye baat sab pe magar āshkārā thoḌī hai

tirā firāq to rizq-e-halāl hai mujh ko

ye phal parā.e shajar se utārā thoḌī hai

jo 'ishq kartā hai chaltī havā se laḌtā hai

ye jhagḌā sirf hamārā tumhārā thoḌī hai

dar-e-nigāh pe us ke jo ham ne 'umr gañvā.ī

ye fā.eda hai mirī jaañ ḳhasāra thoḌī hai

ye log tujh se hameñ duur kar rahe haiñ magar

tire baġhair hamārā guzārā thoḌī hai

'jamāl' aaj to jaane kī mat karo jaldī

ki phir nasīb ye sohbat dubāra thoḌī hai

ye shahr apne harifon se haara thoDi hai

ye baat sab pe magar aashkara thoDi hai

tera firaq to rizq-e-halal hai mujh ko

ye phal parae shajar se utara thoDi hai

jo 'ishq karta hai chalti hawa se laDta hai

ye jhagDa sirf hamara tumhaara thoDi hai

dar-e-nigah pe us ke jo hum ne 'umr ganwai

ye faeda hai meri jaan KHasara thoDi hai

ye log tujh se hamein dur kar rahe hain magar

tere baghair hamara guzara thoDi hai

'jamal' aaj to jaane ki mat karo jaldi

ki phir nasib ye sohbat dubara thoDi hai