wo sitam na Dhae to kya kare use kya KHabar ki wafa hai kya?

vo sitam na Dhaa.e to kyā kare use kyā ḳhabar ki vafā hai kyaa?

tū usī ko pyaar kare hai kyuuñ ye 'kalīm' tujh ko huā hai kyaa?

tujhe sañg-dil ye pata hai kyā ki dukhe diloñ kī sadā hai kyaa?

kabhī choT tū ne bhī khaa.ī hai kabhī terā dil bhī dukhā hai kyaa?

tū ra.īs-e-shahr-e-sitam-garāñ maiñ gadā-e-kūcha-e-āshiqāñ

tū amiir hai to batā mujhe maiñ ġharīb huuñ to burā hai kyaa?

tū jafā meñ mast hai roz-o-shab maiñ kafan-ba-dosh o ġhazal-ba-lab

tire ro.ab-e-husn se chup haiñ sab maiñ bhī chup rahūñ to mazā hai kyaa?

ye kahāñ se aa.ī hai surḳh-rū hai har ek jhoñkā lahū lahū

kaTī jis meñ gardan-e-ārzū ye usī chaman kī havā hai kyaa?

abhī terā daur-e-shabāb hai abhī kyā hisāb-o-kitāb hai

abhī kyā na hogā jahān meñ abhī is jahāñ meñ huā hai kyaa?

yahī ham-navā yahī ham-suḳhan yahī ham-nishāñ yahī ham-vatan

mirī shā.irī hī batā.egī mirā naam kyā hai patā hai kyaa?

wo sitam na Dhae to kya kare use kya KHabar ki wafa hai kya?

tu usi ko pyar kare hai kyun ye 'kalim' tujh ko hua hai kya?

tujhe sang-dil ye pata hai kya ki dukhe dilon ki sada hai kya?

kabhi choT tu ne bhi khai hai kabhi tera dil bhi dukha hai kya?

tu rais-e-shahr-e-sitam-garan main gada-e-kucha-e-ashiqan

tu amir hai to bata mujhe main gharib hun to bura hai kya?

tu jafa mein mast hai roz-o-shab main kafan-ba-dosh o ghazal-ba-lab

tere roab-e-husn se chup hain sab main bhi chup rahun to maza hai kya?

ye kahan se aai hai surKH-ru hai har ek jhonka lahu lahu

kaTi jis mein gardan-e-arzu ye usi chaman ki hawa hai kya?

abhi tera daur-e-shabab hai abhi kya hisab-o-kitab hai

abhi kya na hoga jahan mein abhi is jahan mein hua hai kya?

yahi ham-nawa yahi ham-suKHan yahi ham-nishan yahi ham-watan

meri shairi hi bataegi mera nam kya hai pata hai kya?