naqsh sare KHak ke hain sab hunar miTTi ka hai

naqsh saare ḳhaak ke haiñ sab hunar miTTī kā hai

is dayār-e-rañg-o-bū meñ bast-o-dar miTTī kā hai

kuchh to apnī gardaneñ kaj haiñ havā ke zor se

aur kuchh apnī tabī.at meñ asar miTTī kā hai

chāñdnī ḳhandāñ hai apne hujra-e-mahtāb par

aur maiñ nāzāñ huuñ is par merā ghar miTTī kā hai

rahmateñ barsā ke bhī abr-e-karam chhaTtā nahīñ

aise lagtā hai ki saaya charḳh par miTTī kā hai

ḳhaak se uThte nahīñ chaltī havā ke saath ham

ijz-e-ḳhātir par bahut gahrā asar miTTī kā hai

ik namūna hai kisī kī san.at-e-timsāl kā

ye jo khiḌkī hai sadā kī ye jo ghar miTTī kā hai

kyuuñ na ḳhū-e-ḳhāk se ḳhasta rahe merī anā

pā-ba-gil huuñ aur ḳhamīr-e-motabar miTTī kā hai

naqsh sare KHak ke hain sab hunar miTTi ka hai

is dayar-e-rang-o-bu mein bast-o-dar miTTi ka hai

kuchh to apni gardanen kaj hain hawa ke zor se

aur kuchh apni tabiat mein asar miTTi ka hai

chandni KHandan hai apne hujra-e-mahtab par

aur main nazan hun is par mera ghar miTTi ka hai

rahmaten barsa ke bhi abr-e-karam chhaTta nahin

aise lagta hai ki saya charKH par miTTi ka hai

KHak se uThte nahin chalti hawa ke sath hum

ijz-e-KHatir par bahut gahra asar miTTi ka hai

ek namuna hai kisi ki sanat-e-timsal ka

ye jo khiDki hai sada ki ye jo ghar miTTi ka hai

kyun na KHu-e-KHak se KHasta rahe meri ana

pa-ba-gil hun aur KHamir-e-motabar miTTi ka hai