main bhi sharik-e-marg hun mar mere samne

maiñ bhī sharīk-e-marg huuñ mar mere sāmne

merī sadā ke phuul bikhar mere sāmne

āḳhir vo aarzū mere sar par savār thī

laa.e the jis ko ḳhāk-ba-sar mere sāmne

kahte nahīñ haiñ us kā suḳhan mere aas paas

dete nahīñ haiñ us kī ḳhabar mere sāmne

aage baḌhūñ to zard ghaTā mere rū-ba-rū

pīchhe muḌūñ to gard-e-safar mere sāmne

maiñ ḳhud kisī ke ḳhuun kī āñdhī huuñ in dinoñ

uḌtī huī havā se na Dar mere sāmne

āñkhoñ meñ raakh Daal ke niklā huuñ sair ko

shāḳhoñ pe nāchte haiñ sharar mere sāmne

taarī hai ik sukūt 'zafar' ḳhāk-o-ḳhisht par

jaarī hai bādaloñ kā safar mere sāmne

main bhi sharik-e-marg hun mar mere samne

meri sada ke phul bikhar mere samne

aaKHir wo aarzu mere sar par sawar thi

lae the jis ko KHak-ba-sar mere samne

kahte nahin hain us ka suKHan mere aas pas

dete nahin hain us ki KHabar mere samne

aage baDhun to zard ghaTa mere ru-ba-ru

pichhe muDun to gard-e-safar mere samne

main KHud kisi ke KHun ki aandhi hun in dinon

uDti hui hawa se na Dar mere samne

aankhon mein rakh Dal ke nikla hun sair ko

shaKHon pe nachte hain sharar mere samne

tari hai ek sukut 'zafar' KHak-o-KHisht par

jari hai baadalon ka safar mere samne