kisi bhi baat ka jab etibar mushkil hai

kisī bhī baat kā jab e'tibār mushkil hai

phir aise meñ yahāñ rahnā to yaar mushkil hai

kuchh aur vus'ateñ darkār haiñ mohabbat ko

visāl-o-hijr pe dār-o-madār mushkil hai

ki muskurānā bhī paḌtā hai fātehāna hameñ

tire shikasta-diloñ kī hazār mushkil hai

sar-e-riyāsat-e-ulfat nizām hai aisā

koī mile yahāñ be-rozgār mushkil hai

udhār ḳhvāb ḳharīdeñ aur āñkheñ becheñ naqd

ye kārobār hai aur kārobār mushkil hai

tū kin fazāoñ meñ hai ai raqīb-e-‘aish-pasand

tirī ḳhizāñ se hamārī bahār mushkil hai

na us ko chūmeñ to rasta bhaTaktī haiñ sāñseñ

aur us ko chūmnā bhī baar baar mushkil hai

ab us ko milne lage ‘āshiqān-e-juz-vaqtī

lihāzā apnā shumār-o-qatār mushkil hai

kisi bhi baat ka jab e'tibar mushkil hai

phir aise mein yahan rahna to yar mushkil hai

kuchh aur wus'aten darkar hain mohabbat ko

visal-o-hijr pe dar-o-madar mushkil hai

ki muskurana bhi paDta hai fatehana hamein

tere shikasta-dilon ki hazar mushkil hai

sar-e-riyasat-e-ulfat nizam hai aisa

koi mile yahan be-rozgar mushkil hai

udhaar KHwab KHariden aur aankhen bechen naqd

ye karobar hai aur karobar mushkil hai

tu kin fazaon mein hai ai raqib-e-‘aish-pasand

teri KHizan se hamari bahaar mushkil hai

na us ko chumen to rasta bhaTakti hain sansen

aur us ko chumna bhi bar bar mushkil hai

ab us ko milne lage ‘ashiqan-e-juz-waqti

lihaza apna shumar-o-qatar mushkil hai