KHushk putli se koi surat na Thahrai gai

ḳhushk putlī se koī sūrat na Thahrā.ī ga.ī

aañkh se aañsū ga.e merī ki bīnā.ī ga.ī

sub.h-dam kyā DhūñDte ho shab-ravoñ ke naqsh-e-pā

jab se ab tak bār-hā mauj-e-sabā aa.ī ga.ī

ro rahā huuñ har purānī chiiz ko pahchān kar

jaane kis kī ruuh mere ruup meñ laa.ī ga.ī

mutma.in ho dekh kar tum rañg-e-tasvīr-e-hayāt

phir vo shāyad vo nahīñ jo mujh ko dikhlā.ī ga.ī

chalte chalte kaan meñ kis kī sadā aane lagī

yuuñ lagā jaise mirī barsoñ kī tanhā.ī ga.ī

ham ki apnī raah kā patthar samajhte haiñ use

ham se jaane kis liye duniyā na Thukrā.ī ga.ī

KHushk putli se koi surat na Thahrai gai

aankh se aansu gae meri ki binai gai

subh-dam kya DhunDte ho shab-rawon ke naqsh-e-pa

jab se ab tak bar-ha mauj-e-saba aai gai

ro raha hun har purani chiz ko pahchan kar

jaane kis ki ruh mere rup mein lai gai

mutmain ho dekh kar tum rang-e-taswir-e-hayat

phir wo shayad wo nahin jo mujh ko dikhlai gai

chalte chalte kan mein kis ki sada aane lagi

yun laga jaise meri barson ki tanhai gai

hum ki apni rah ka patthar samajhte hain use

hum se jaane kis liye duniya na Thukrai gai