aag ek aur laga denge hamare aansu

aag ik aur lagā deñge hamāre aañsū

nikle āñkhoñ se agar dil ke sahāre aañsū

hāsil-e-ḳhūn-e-jigar dil ke haiñ paare aañsū

be-bahā la.al-o-guhar haiñ ye hamāre aañsū

hai koī ab jo lagī dil kī bujhā.e merī

hijr meñ roke gañvā baiThā huuñ saare aañsū

us masīhā kī jo furqat meñ huuñ royā shab-bhar

ban ga.e charḳh-e-chahārum ke sitāre aañsū

ḳhūn-e-dil ḳhūn-e-jigar bah gayā paanī ho kar

kuchh na kaam aa.e mohabbat meñ hamāre aañsū

mujh ko sone na diyā ashk-fishānī ne mirī

raat bhar ginte rahe charḳh ke taare aañsū

vo sañvar kar kabhī aa.e jo tasavvur meñ mire

chashm-e-mushtāq ne sadqe meñ utāre aañsū

paas rusvā.ī ne chhoḌā na sukūñ kā dāman

girte girte ruke āñkhoñ ke kināre aañsū

lutf ab aayā mirī ashk-fishānī kā huzūr

pyārī āñkhoñ se kisī ke bahe pyāre aañsū

merī qismat meñ hai ronā mujhe ro lene do

tum na is tarah bahāo mire pyāre aañsū

māh-o-anjum pe na phir apne kabhī naaz kare

dekh le charḳh kisī din jo hamāre aañsū

yuuñ hī tūfāñ jo uThāte rahe kuchh din 'naushād'

aag duniyā meñ lagā deñge hamāre aañsū

aag ek aur laga denge hamare aansu

nikle aankhon se agar dil ke sahaare aansu

hasil-e-KHun-e-jigar dil ke hain pare aansu

be-baha lal-o-guhar hain ye hamare aansu

hai koi ab jo lagi dil ki bujhae meri

hijr mein roke ganwa baiTha hun sare aansu

us masiha ki jo furqat mein hun roya shab-bhar

ban gae charKH-e-chahaarum ke sitare aansu

KHun-e-dil KHun-e-jigar bah gaya pani ho kar

kuchh na kaam aae mohabbat mein hamare aansu

mujh ko sone na diya ashk-fishani ne meri

raat bhar ginte rahe charKH ke tare aansu

wo sanwar kar kabhi aae jo tasawwur mein mere

chashm-e-mushtaq ne sadqe mein utare aansu

pas ruswai ne chhoDa na sukun ka daman

girte girte ruke aankhon ke kinare aansu

lutf ab aaya meri ashk-fishani ka huzur

pyari aankhon se kisi ke bahe pyare aansu

meri qismat mein hai rona mujhe ro lene do

tum na is tarah bahao mere pyare aansu

mah-o-anjum pe na phir apne kabhi naz kare

dekh le charKH kisi din jo hamare aansu

yun hi tufan jo uThate rahe kuchh din 'naushad'

aag duniya mein laga denge hamare aansu