mausam badla rut gadrai ahl-e-junun bebak hue

mausam badlā rut gadrā.ī ahl-e-junūñ bebāk hue

fasl-e-bahār ke aate aate kitne girebāñ chaak hue

gul-būToñ ke rañg aur naqshe ab to yūñhī miT jā.eñge

ham ki faroġh-e-sub.h-e-chaman the pāband-e-fitrāk hue

mohr-e-taġhayyur is dhaj se āfāq ke māthe par chamkā

sadiyoñ ke uftāda zarre ham-dosh-e-aflāk hue

dil ke ġham ne dard-e-jahāñ se mil ke baḌā bechain kiyā

pahle palkeñ pur-nam thiiñ ab aariz bhī namnāk hue

kitne alhaḌ sapne the jo duur sahar meñ TuuT ga.e

kitne hañsmukh chehre fasl-e-bahārāñ meñ ġhamnāk hue

barq-e-zamāna duur thī lekin mish.al-e-ḳhāna duur na thī

ham to 'zahīr' apne hī ghar kī aag meñ jal kar ḳhaak hue

mausam badla rut gadrai ahl-e-junun bebak hue

fasl-e-bahaar ke aate aate kitne gireban chaak hue

gul-buTon ke rang aur naqshe ab to yunhi miT jaenge

hum ki farogh-e-subh-e-chaman the paband-e-fitrak hue

mohr-e-taghayyur is dhaj se aafaq ke mathe par chamka

sadiyon ke uftada zarre ham-dosh-e-aflak hue

dil ke gham ne dard-e-jahan se mil ke baDa bechain kiya

pahle palken pur-nam thin ab aariz bhi namnak hue

kitne alhaD sapne the jo dur sahar mein TuT gae

kitne hansmukh chehre fasl-e-bahaaran mein ghamnak hue

barq-e-zamana dur thi lekin mishal-e-KHana dur na thi

hum to 'zahir' apne hi ghar ki aag mein jal kar KHak hue