kabhi wo KHush bhi raha hai kabhi KHafa hua hai

kabhī vo ḳhush bhī rahā hai kabhī ḳhafā huā hai

ki saarā marhala tai mujh se barmalā huā hai

nashisteñ pur haiñ charāġh-o-ayāġh raushan haiñ

bas ek mere na hone se aaj kyā huā hai

uThā ke rakh do kitāb-e-firāq ko dil meñ

ki ye fasāna azal se mirā sunā huā hai

kabhī na ḳhālī milā bū-e-ham-nafas se dimāġh

tamām baaġh meñ jaise koī chhupā huā hai

mirī giraft meñ aatā nahīñ hai vo pal-bhar

mirī nazar se mirā dil abhī bachā huā hai

usī ke izn-o-razā se hai sab nigah-dārī

ki dām-o-dāna sabhī kuchh yahāñ paḌā huā hai

maiñ ḳhvāb meñ bhī vo dāman pakaḌ nahīñ saktā

ye haath aur kisī haath meñ diyā huā hai

yahī bahut hai agar ek ham-suḳhan mil jaa.e

maiñ sun rahā huuñ mirā dil bhī to dukhā huā hai

miyān-e-va.ada koī 'uzr ab ke mat laanā

ki rāheñ sahl haiñ aur zaḳhm bhī khulā huā hai

vo be-ḳhabar hai mirī jast-o-ḳhez se shāyad

ye kaun hai jo muqābil mire khaḌā huā hai

kabhi wo KHush bhi raha hai kabhi KHafa hua hai

ki sara marhala tai mujh se barmala hua hai

nashisten pur hain charagh-o-ayagh raushan hain

bas ek mere na hone se aaj kya hua hai

uTha ke rakh do kitab-e-firaq ko dil mein

ki ye fasana azal se mera suna hua hai

kabhi na KHali mila bu-e-ham-nafas se dimagh

tamam bagh mein jaise koi chhupa hua hai

meri giraft mein aata nahin hai wo pal-bhar

meri nazar se mera dil abhi bacha hua hai

usi ke izn-o-raza se hai sab nigah-dari

ki dam-o-dana sabhi kuchh yahan paDa hua hai

main KHwab mein bhi wo daman pakaD nahin sakta

ye hath aur kisi hath mein diya hua hai

yahi bahut hai agar ek ham-suKHan mil jae

main sun raha hun mera dil bhi to dukha hua hai

miyan-e-wada koi 'uzr ab ke mat lana

ki rahen sahl hain aur zaKHm bhi khula hua hai

wo be-KHabar hai meri jast-o-KHez se shayad

ye kaun hai jo muqabil mere khaDa hua hai