hum apne-ap pe bhi zahir kabhi dil ka haal nahin karte

ham apne-āp pe bhī zāhir kabhī dil kā haal nahīñ karte

chup rahte haiñ dukh sahte haiñ koī ranj-o-malāl nahīñ karte

ham jo kuchh haiñ ham jaise haiñ vaise hī dikhā.ī dete haiñ

chehre pe bhabhūt nahīñ malte kabhī kaale baal nahīñ karte

ham haar ga.e tum jiit ga.e ham ne khoyā tum ne paayā

in chhoTī chhoTī bātoñ kā ham koī ḳhayāl nahīñ karte

tere dīvāne ho jaate kahīñ sahrāoñ meñ kho jaate

dīvār-o-dar meñ qaid hameñ agar ahl-o-ayāl nahīñ karte

tirī marzī par ham raazī haiñ jo tū chāhe so ham chāheñ

ham hijr kī fikr nahīñ karte ham zikr-e-visāl nahīñ karte

hameñ tere sivā is duniyā meñ kisī aur se kyā lenā-denā

ham sab ko javāb nahīñ dete ham sab se savāl nahīñ karte

ġhazloñ meñ hamārī boltā hai vahī kānoñ meñ ras gholtā hai

vahī band kivāḌe kholtā hai ham koī kamāl nahīñ karte

hum apne-ap pe bhi zahir kabhi dil ka haal nahin karte

chup rahte hain dukh sahte hain koi ranj-o-malal nahin karte

hum jo kuchh hain hum jaise hain waise hi dikhai dete hain

chehre pe bhabhut nahin malte kabhi kale baal nahin karte

hum haar gae tum jit gae hum ne khoya tum ne paya

in chhoTi chhoTi baaton ka hum koi KHayal nahin karte

tere diwane ho jate kahin sahraon mein kho jate

diwar-o-dar mein qaid hamein agar ahl-o-ayal nahin karte

teri marzi par hum raazi hain jo tu chahe so hum chahen

hum hijr ki fikr nahin karte hum zikr-e-visal nahin karte

hamein tere siwa is duniya mein kisi aur se kya lena-dena

hum sab ko jawab nahin dete hum sab se sawal nahin karte

ghazlon mein hamari bolta hai wahi kanon mein ras gholta hai

wahi band kiwaDe kholta hai hum koi kamal nahin karte