fasurda ho ke maiKHane se nikle

fasurda ho ke maiḳhāne se nikle

yahāñ bhī apne begāne se nikle

shafaq kā rañg gahrā kar ga.e aur

jo sho.ale mere kāshāne se nikle

zarā ai gardish-e-daurāñ Thaharnā

vo nikle riñd maiḳhāne se nikle

ġham-e-dil kā asar har bazm meñ hai

sab afsāne us afsāne se nikle

kiyā ābād vīrāne ko ham ne

hamīñ ābād vīrāne se nikle

jo pahuñche daar tak mansūr the vo

hazāroñ riñd maiḳhāne se nikle

nikalte ham na ġham-ḳhāne se 'aḳhtar'

hasīñ mausam ke bahkāne se nikle

fasurda ho ke maiKHane se nikle

yahan bhi apne begane se nikle

shafaq ka rang gahra kar gae aur

jo shoale mere kashane se nikle

zara ai gardish-e-dauran Thaharna

wo nikle rind maiKHane se nikle

gham-e-dil ka asar har bazm mein hai

sab afsane us afsane se nikle

kiya aabaad virane ko hum ne

hamin aabaad virane se nikle

jo pahunche dar tak mansur the wo

hazaron rind maiKHane se nikle

nikalte hum na gham-KHane se 'aKHtar'

hasin mausam ke bahkane se nikle