aankhon ke KHwab dil ki jawani bhi le gaya

āñkhoñ ke ḳhvāb dil kī javānī bhī le gayā

vo apne saath merī kahānī bhī le gayā

ḳham-cham tamām apnā bas ik us ke dam se thā

vo kyā gayā ki aag bhī paanī bhī le gayā

TuuTā ta.alluqāt kā ā.īna is tarah

aks-e-nashāt-e-lamaha-e-fānī bhī le gayā

kūche meñ hijratoñ ke huuñ sab se alag-thalag

bichhḌā vo yuuñ ki rabt-e-makānī bhī le gayā

the sab usī ke lams se jal-thal bane hue

dariyā muḌā to apnī ravānī bhī le gayā

ab kyā khulegī munjamid alfāz kī girah

vo himmat-e-kashūd-e-ma.ānī bhī le gayā

sar-joshī-e-qalam ko 'fazā' chup sī lag ga.ī

vo jaate jaate shola-bayānī bhī le gayā

aankhon ke KHwab dil ki jawani bhi le gaya

wo apne sath meri kahani bhi le gaya

KHam-cham tamam apna bas ek us ke dam se tha

wo kya gaya ki aag bhi pani bhi le gaya

TuTa talluqat ka aaina is tarah

aks-e-nashat-e-lamaha-e-fani bhi le gaya

kuche mein hijraton ke hun sab se alag-thalag

bichhDa wo yun ki rabt-e-makani bhi le gaya

the sab usi ke lams se jal-thal bane hue

dariya muDa to apni rawani bhi le gaya

ab kya khulegi munjamid alfaz ki girah

wo himmat-e-kashud-e-maani bhi le gaya

sar-joshi-e-qalam ko 'faza' chup si lag gai

wo jate jate shola-bayani bhi le gaya